भांगरभूंय | प्रतिनिधी
फक्त दुबावाच्या आदारार दोशी थारावंक शकनात
मुंबय : मालेगांव स्फोट प्रकरणांतल्या सगल्या आरोपींक निर्दोश मुक्त केले. फकत दुबावाच्या आदारार आरोपींक दोशी थारावपाक शकनात. हाका लागून सगल्यांची निर्दोश सुटका करतात, अशें एनआयएच्या विशेश न्यायालयान सांगलें. १००० पानां परस चड पानांचो निकाल आशिल्ल्याचेंय स्पश्ट केलें. मालेगांवांत २९ सप्टेंबर २००८ वर्सा हो भिरांकूळ बॉम्बस्फोट जाल्लो. भिक्खू चौकांत जाल्ल्या ह्या स्फोटांत ६ जाणांक मरण आयिल्लें. जाल्यार १०० परस चड जाण गंभीर जखमी जाल्ले. बॉम्बस्फोटाचे हे घडणुके उपरांत खुबशीं कुटुंबां उध्वस्त जाल्लीं. आतां, वट्ट १७ वर्सां उपरांत ह्या प्रकरणाचो निकाल मुंबयच्या एनआयए ह्या विशेश न्यायालयांत आयज दिला. सगल्या आरोपींनी न्यायालयाचे उपकार मानले. आयज आमकां खर्या अर्थान न्याय मेळ्ळो, अशें म्हणीत आरोपी भावूक जाल्ल्याचेंय पळोवपाक मेळ्ळें.
न्यायालयान निकाल दितना कितें सांगलें?
बॉम्ब स्फोट जाल्ल्याचें सरकारी पक्षान सिद्ध केलें. मात, ब्लास्ट स्कुटरींत जाला हें सिद्ध करपाक सरकारी पक्ष अपेशी थारिल्ल्याचें न्यायालयान सांगलें. तपासांत खुबशे दोश आशिल्ले. तांचें सगळ्यांचें वाचनूय न्यायालयांत केलें. पंचनामो योग्य नाशिल्लो. जाग्यावेल्यान हातांचे ठशे जप्त करूंक ना, अशेंय निरीक्षण न्यायालयान नोंद केलें. दुचाकीचो चेसीस नंबर रिकव्हर करूंक ना. साध्वी प्रज्ञा सिंह ठाकूर दुचाकीची धनी आशिल्ली हेंय स्पश्ट ना, कर्नल प्रसाद पुरोहीतान आरडीएक्स हाडलें, ताचोय पुरावो ना, अशें न्यायालयान स्पश्ट केलें. बसके विशीं तपास यंत्रणेच्या दाव्यांचेर न्यायालयाचें समाधान जावंक ना. आदीं लायिल्ल्या मोक्का उपरांत फाटीं घेतिल्ल्यान हाचे खालचे सगळे जबाब निरर्थक आशिल्ल्याचें न्यायालयान सांगलें.
निर्दोश थारिल्ल्यांचीं नांवां: प्रसाद पुरोहित, 2. साध्वी प्रज्ञासिंह, 3. समीर कुलकर्णी, 4. रमेश उपाध्याय, 5. अजय राहिरकर, 6. सुधाकर द्विवेदी
7. सुधाकर चतुर्वेदी, 8. रामजी कालसंग्रा – फरारी, 9. शामजी साहू – फरारी, 10. संदीप डांगे – फरारी, 11. प्रविण तकलकी – फरारी, 12. राकेश धावडे – फरारी.
भगव्याचें जैत जालें, हिंदुत्वाचो जैत जालें. जांणी हिंदुत्वाक आतंकवादाचें नांव दिलें, तांकां देश केन्नाच माफ करचो ना, अशें निकाला उपरांत प्रज्ञासिंह ठाकूर हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
