भांगरभूंय | प्रतिनिधी
पणजी ः मालीम हांगा नुस्तेमारी करप्यांखातीर अत्याधुनीक सुविधा आशिल्ली तरंगपी जेटीचे काम बेगीन सुरू जातले. राज्यांन मत्स्यसंपदा येवजणे खाला प्रकल्प आराखडो (डीपीआर) केंद्राक सादर केलां. केंद्रा कडल्यान मान्यताय मेळ्ळ्या उपरांत काम सुरू जातले अशी म्हायती नुस्तेमारी मंत्री नीळकंठ हळर्णकार हांणी दिली.
नुस्तेमारी मंत्री नीळकंठ हळर्णकार हांणी खात्याच्या अधिकाऱ्यां सयत मालीम जेटीक भेट दिवन मालीम जेटीची पळोवणी केली. मालीम जेटीच्या विस्ताराचे काम जीएसआयडीसी वरवीं सुरू आसा. हें काम कंत्राटदारान अर्दवट दवरला. हें काम पुराय करपाती म्हायती जीएसआयडीसीक दितले. उदक, शौचालय आनी हेर सुविधा निर्माण करपा वांगडाच जेटीच्या विस्ताराचे काम चालू आसा अशें हळर्णकार हांणी सांगलें.
सद्याचे जेटीचो विस्तार करपा वांगडाच लागसार वेगळी तरंगपी जेटी बांदपाचो प्रस्ताव आसा. हे संबंदीचो प्रकल्प आराखडो केंद्राक धाडलां. मत्स्यसंपदा येवजणे खाला तरंगपी जेटी बांदतले. थळाव्या नुस्तेमारी करप्यांक चड सुविधा दिवप हो हाचे फाटलो हेत आसा. ह्या कामाची फाटपुरवण हांव केंद्रा कडेन करतलो अशें हळर्णकार हांणी सांगलें.
चवथीच्या वेळार कुटबण जेटीचेर कामगारांक कोलेराची लागण जाल्ली. हाका लागून कामगाराक मरण आयिल्लें. हाचेर उपाय म्हणून जेटीचेर नितळसाण दवरप गरजेचें आसा. कुटबण जेटीचेर सीसीटीव्ही कॅमेरे बसयल्यात. तशेंच फुडाराक मालीम जेटीचेरुय सीसीटीव्ही कॅमेरे बसयतले. नितळसाण सांबाळपा खातीर शैचालय आनी उदकाची वेवस्था करतले. नितळसाण सांबाळपा वांगडाच तांची भलायकी तपासप ही कामगार तशेंच ट्रॉलर धनयांची जापसालदारकी आसा अशें नुस्तेमारी मंत्री नीळकंठ हळर्णकर हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
