भांगरभूंय | प्रतिनिधी
मडगांवः वार्का पोरन्या मालमत्तेच्या वादाक लागून लासिमा गाल्डिनो हे बायलेचेर लोखणाच्या रॉडान जिवघेणो हल्लो करून तिका गंभीर जखमी केली. ह्या प्रकरणांत कोलवा पुलिसांनी दुबावीत ज्यो परेरा हाचे आड खून करपाचो यत्न आनी चोरीचो गुन्यांव नोंद केला.
मेळिल्ले म्हायती प्रमाण, शुक्रारा दनपारां वार्काच्या फीडमोअर रेस्टॉरंट लागसार ही मारपेटाची घडणूक घडली. मालमत्ते वयल्यान जाल्लो शाब्दिक वाद मारपेटांत रुपांतरीत जालो. दुबावीत ज्यो परेरा हाणें लासिमा गाल्डिनोच्या तकलेचेर लोखणाच्या रॉडान हल्लो केलो. हातूंत ती गंभीर जखमी जाली. उपरांत तिका उपचारा खातीर जीएमसींत व्हेली. थंय तिचेर उपचार चलतात.
हल्ल्या उपरांत दुबावीत ज्यो परेरान लासिमाचो मोबायल घेवन पळून गेलो. दुबावीत ज्यो परेरा हाचेर पुलिसांनी कलम 307 (खून करपाचो यत्न) आनी चोरी खाला गुन्यांव नोंद केला. दुबावितान आपलो मोबायल बंद केला आनी कोलवा पुलीस ताचो सोद घेतात. पुलीस निरिक्षक विक्रम नायक हांच्या मार्गदर्शना खाला पुलीस उपनिरिक्षक रक्षा नायक फुडलो तपास करतात.
मजगतीं, हे घडणुके उपरांत आदले मंत्री चर्चिल आलेमाव हांणी पत्रकार परिशद घेतली आनी पुलिसांनी आनी गृहमंत्र्यानी हे घडणुकेची दखल घेवन गुंडगिरी करप्यां आड खर कारवाय करची अशी मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
