भांगरभूंय | प्रतिनिधी
मडगांव, प्रतिनिधी ः नेसाय – पाद्रीभाट वाठारांत मालमत्तेच्या वादाक लागून फ्लोरिना फर्नांडीस (53) हिचो चाकू तोपून खून केलो. ह्या प्रकरणांत दुबावीत मारिओ फर्नांडीस (34) हाका मायणा कुडटरी पुलिसांनी तीन वरां भितर अटक केली. हांतूत आनीक एक मनीस जखमी जाल्ल्याचेंय पुलिसांनी सांगलें.
मेळिल्ले म्हायती प्रमाण, फ्लोरिना फर्नांडीस आनी मारिओ फर्नांडीस हांचे मदीं नेसाय पाद्रीभाट वाठारांत मालमत्ते वयल्यान वाद सुरू जालो. रातच्या सुमार पावणे इकराक ह्याच वादांतल्यान मारिओन चाकू काडून फ्लोरिनाचेर हल्लो केलो. मारिओ फ्लोरिनाक चाकू मारतना तिका वाटावपाक गेल्लो आनीक एक मनीस जखमी जालो. घडणुके उपरांत मारिओ थंय सावन पळून गेलो.
गंभीर जखमी जाल्ली फ्लोरिनाक हॉस्पिटलांत व्हेले तेन्ना तिका मरण आयिल्ल्याचें जाहीर केलें. हे घडणुकेची म्हायती मेळ्ळ्या उपरांत मायणा कुडटरी पुलीस घडणूक सुवातेर पावले. पुलिसांनी पंचनामो केलो. पुलीस निरिक्षक अरुण गांवस देसाय हांच्या मार्गदर्शना खाला दुबावीत मारिओ फर्नांडीस हाका तीन वरां भितर अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
