भांगरभूंय | प्रतिनिधी
गोंयां सयत हेर राज्यांनी २०० कोटींचेर मारला हात
नवी दिल्लीः देशांतली पॉश लोकॅलिटी म्हणून वळख आशिल्ले गुरुग्रामची ’डीएलएफ कॅमेलियास’ आनी दिल्लीचें ’म्बियन्स मॉल’ ह्या आलिशान मालमत्तांच्या नांवान खुबश्या जाणांक कोट्यांनी रुपयांची तोपी घातल्ले एके आंतरराज्य टोळयेक दिल्ली गुन्यांव फांट्यान उक्तडार हाडल्या. बँकेचीं बनावट कागदपत्रां आनी पावणेंचे फट दावे वापरून २०० कोटी रुपयां वयर फटोवपी ह्या रॅकेटाचो मास्टरमायंड मोहित गोगिया सयत पांच जाणांक अटक केल्या. दिल्ली पुलिसांचे हे कारवायेक लागून देशभरांतल्या लक्झरी रियल इस्टेट खरेदी करप्यां मदीं खवदळ जाला.
ह्या प्रकरणाचो तपास दिल्लीच्या चाणक्यपुरीच्या गुन्यांव फांट्याच्या आंतरराज्य कक्षान केला. दुबावितांनी स्टेट बँक ऑफ इंडिया वतीन काडिल्लें पावणेंचें बनावट प्रमाणपत्र दाखोवन कागाळदाराक गुरुग्रामांतले एके प्रीमियम मालमत्तेचें हांयस दाखयलें. ताका बळी पडून कागाळदारान १२.०४ कोटी रुपया आरोपींच्या खात्यांत धाडले. मात, जेन्ना कागदपत्रांचें बँकेन व्हॅरिफिकेशन केलें तेन्ना विक्री प्रमाणपत्र, पावणेची पावती आनी कव्हरिंग लेटर्स हीं सगलीं कागदपत्रां बनावट आशिल्ल्याचें समजलें. हे म्हायतीच्या आदारार पुलिसांनी दिल्ली, भोपाळ आनी मुंबयक छापे घाले. तांत्रीक देखरेखीचे मजतीन मुखेल आरोपी मोहित गोगिया हाका मुंबयच्यान उत्तराखंड पळ काडटना ऋषिकेश-डेहराडून रस्त्यार अटक केली.
हे टोळयेची काम करपाची तरा संघटीत आशिल्ल्यान तांणी दिल्ली, पंजाब, मध्य प्रदेश आनी गोंयां सयत खुबश्या राज्यांनी २०० कोटीं परस चड रुपयांचेर हात मारला. आरोपी आड देशांत १४ गुन्यांव दाखल केल्यात. ह्या रॅकेटाचो दुसरो सुत्रधार राम सिंग ऊर्फ बाबाजी हो आजूनय फरारी आसा, पुलीस ताचो सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
