भांगरभूंय | प्रतिनिधी
नवी दिल्ली, खबरां संस्था ः घरमालक आनी भाडेकार हांचे मदल्या वादाच्या प्रकरणांत न्यायालयान पयलींच खूब मार्गदर्शक सुचोवण्यो दिल्यांत. ते उपरांत आतां एक नवें प्रकरण मुखार आयला. तातूंत दिल्ली उच्च न्यायालयान मालकाच्या हक्काची राखण करतना, खंयचोच भाडेकार आपली मालमत्ता कशी वापरची हें घरमालकाक सांगूंक शकना अशें म्हणलां. घरमालक आनी भाडेकार हांचे मदल्या वादांत न्यायालयान ही टिप्पणी केल्या. हे प्रकरण दुकान रितें करपा विशींचे आशिल्लें.
मुंडकारांक तांच्या जमनीच्या हक्का पसून वंचीत दवरुंक मेळना. जमनीच्या मालकाक ताची जमीन कशी वापरची हाचेर न्यायालय खंयचोय आदेश दिवंक शकता. दुकानदारान दाखल केल्ले याचिकेचेर उच्च न्यायालयान सांगलें, दुकानाच्या मालकाक आपली सुवात पुरायपणान रिती करुन घेवपाचो पुराय अधिकार आसा.
भाडेकार हाचे पयलीं कनिष्ठ न्यायालयात गेल्लो. पूण थंय सुटका मेळूंक नाशिल्ल्यान तो उच्च न्यायालयांत पावलो. उपरांत न्यायालयानय ही याचिका न्हयकारली. दुकानदारान न्यायालयांत सांगलें, आपूण आनी आपलो चलो हे मालमत्तेचे संयुक्त मालक आसात म्हज्या चल्याक ह्या जाग्यार वेवसाय करपाचो आसा म्हणून हांवें भाडेकाराक दुकान रितें करपाक सांगलें.
ह्या प्रकरणांत भाड्याकरांनय आपली बाजू मांडली. ही पुराय सुवात 14 भाडेकारांनी घेतल्या. घरमालकान पयशांचे आशेन ही याचिका दाखल केल्या. वाठारांतल्या घरां आनी दुकानांचे दर वाडिल्ल्यान दुकानदारां कडल्यान चड भाडें घेवपाचोय तो विचार करता, असो युक्तीवाद भाडेकारान केलो. पूण भाडेकरांचें म्हणणें न्यायालयान कुशीक दवरलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
