भांगरभूंय | प्रतिनिधी
पेडणें: मालपें- पेडणें राष्ट्रीय म्हामार्ग 66 बायपास रस्त्या वेलें पालसण आनी राखणे वणत परतून नेटाच्या पावसांत कोसळपाची भिरांत मिशन फॉर लोकलचे राजन कोरगांवकार हांणी उक्तायली. सरकारान हाचे कडेन जाता तितले बेगीन लक्ष दिवन उपाय येवजण करची अशी मागणी तांणी केली.
राष्ट्रीय म्हामार्ग 66 चें काम सरकाराचे आवडट्या कंत्राटदार कंपनीक मेळ्ळां. हें काम करीत आसतना त्या कंत्राटदारा कडल्यान खूबश्यो चुकी जाल्यात. खूब जाणांचें लुकसाण जावपाचे प्रकार घडल्यात. रस्तो करीत आसतना मनशांक मरण लेगीत आयलां. ह्या कंत्राटदाराचेर सरकारान आयज मेरेन कसलेच तरेची कारवाय केल्ली ना. हाचो परिणाम कंत्राटदार मनमानी पद्दतीन राष्ट्रीय म्हामार्गाचें काम आपल्याक जाय तशें करीत आसा अशें कोरगांवकार हांणी म्हणलें.
मालपें बायपास राष्ट्रीय म्हामार्ग 66 करीत आसतना सुरवातेकूच रस्तो पुराय जावंक नाशिल्लो. पूण काँक्रिटीकरण पुराय जाल्लें. त्याच वेळार एक मोटें पालसण कोसळ्ळें. त्या वेळार थंय राखणे वणत बांदूंक नाशिल्ली.
पोरूं राखणे वणत उबारली आनी परतून एकदां पावसांत पालसणां सयत राखणे वणत कोसळून रस्तो सगल्या प्रकारचे येरादारीक बंद केलो. उपरांत राखणे वणत उबारपाचें काम पुराय केलें. पूण कांय कडेन आयजूय राखणे वणटीची गरज आसतना थंय राखणे वणत उबारिल्ली ना. ताका लागून पावसाच्या दिसांनी राखणे वणटी सयत पालसण कोसळपाची भिरांत मिशन फॉर लोकलचे राजन कोरगांवकार हांणी उक्तायली.
तशेंच वाहन चालकांनीय ह्या वेळार प्रतिक्रिया दितना सरकाराचें कंत्राटदारा कडेन आडनदर जाल्ल्यान कंत्राटदार मनमानी पद्दतीन रस्त्याचें काम करीत आशिल्ल्याचें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
