भांगरभूंय | प्रतिनिधी
पणजीः कळंगुटेचो टॅक्सी ड्रायव्हर संजीवन वेंगुर्लेकार (65) हाचेर बुधवारा रातीं मालप्यां सुमार पांच-स जाणांनी मेळून हल्लो केलो. हातूंत तो गंभीर जखमी जालो.
मेळिल्ले म्हायती प्रमाण, कळंगूट ते बांदा – सावंतवाडी भाडें आसा अशें सांगून टॅक्सी बुक केली. हाचे उपरांत टॅक्सी ड्रायव्हर वेंगुर्लेकार आनी तें पांच-स जाण बांदा वटेन गेलें. मजगतीं, मालप्यां-पेडणें पावतकच त्या पांच हल्लेखोरांनी ड्रायव्हराचेर हल्लो करून ताका लुटपाचो यत्न केलो.
हातूंत टॅक्सी ड्रायव्हर वेंगुर्लेकार गंभीर जखमी जालो. सध्या ताचेर हॉस्पिटलांत उपचार चलतात. हे घडणुकेची म्हायती मेळ्ळे उपरांत पेडणें पुलिसांनी चवकशी करून एका दुबाविताक ताब्यांत घेतलो. हेर आरोपींचो सोद सुरू आसा अशें पुलिसांनी सांगलें. हे घडणुकेक लागून वाठारांत बोवाळ निर्माण जाला आनी टॅक्सी चालकां मदीं भंयाचें वातावरण पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
