भांगरभूंय | प्रतिनिधी
पेडणें: मालपें राष्ट्रीय महामार्ग ६६ चेर बायपास रस्त्याचेर जी राखणे वणट उबारल्या ती दुसरे फावटी सामकें सकयल्या दर्जाच्या कामाचो नमुनो आशिल्ल्याचो दावो कॉंग्रेसीचे फुडारी आनी समाजीक कार्यकर्ते एडवोकेट जितेंद्र गांवकार हांणी केलो. तशेंच हे वणटी कडेन सरकारान लक्ष दिवपाची गरज आशिल्ली. मात ताचे कडेन आडनदर जाल्ल्याचेंय तांणी सांगलें.
एडवोकेट जितेंद्र गांवकार हांणी मुखार उलयतना सांगलें, फाटल्या देड वर्सा आदीं ही राखणे वणट धोक्याचे स्थितींत आशिल्ली. हाका लागून एक पालसण कोसळून फाटल्या वर्सा वणटूय कोसळ्ळी. उपरांत परत सरकारान हे सुवातेर राखणे वणट उबारली. ती वणट दर्जेदार उबारल्या आसतली अशी अपेक्षा जनतेन धरिल्ली. मात तशें कांयच जावंक ना. सरकारान परत एक फावट हे वणटीचें काम सामकें सकयल्या दर्जाचें केल्ल्याचो दावो एडवोकेट जितेंद्र गावकर हांणी केलो.
सध्या हांगा व्हडा प्रमाणांत माती कोसळिल्ल्यान ती माती राखणे वणटी कडेन आयल्या. राखणे वणटीक वेरो गेल्ल्यान एके वटेन ती लवंडल्ल्याचें दिसता. राखणे वणटी मदींच क्रेक गेल्यात. जर पावस व्हडा प्रमाणांत आयलो आनी देंविल्ले मातयेक लागून राखणे वणट कोसळ्ळ्यार व्हड घडणूक जावपाची शक्यताय आसा. हाका लागून उपजिल्हाधिकार्यांनीय हाचे कडेन बेगोबेग लक्ष घालून कितेंय उपाय करपाची मागणी गांवकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
