भांगरभूंय | प्रतिनिधी
भांगरभूंय । प्रतिनिधी
पेडणेः मालपें चट्टी तें न्हंयबाग देंवती मजगतीं पांचशें मीटराच्या सर्व्हिस रस्त्याची सामकी अवतिकाय जाल्या. हो रस्तो तशेंच ह्या वाठारांतलो दोन किलोमीटरांचो रस्तो 25 मे मेरेन सारको केलो ना जाल्यार एका दिसाचो लाक्षणीक उपास करपाची शिटकावणी पेडणे तालुको विकास समितीचो अध्यक्ष व्यंकटेश नायक हाणे दिल्या.
सर्व्हिस रस्त्याचे पश्चिमेक रस्तो कापल्ल्यान देंगण तयार जाला. हांगा देंवतेर वाहनांक फोणकुलां चुकोवपा खातीर सर्कस करची पडटा. व्हो रस्तो म्हणल्यार अपघातांक आमंत्रण अशे स्थितींत आसा. न्हंयबाग-पोरस्कडे हांगा जंक्शना लागी दोन सुवातेर रस्ते उक्ते आसात. मालपें वटेन येवपी वाहनां देंवणेर उजव्या लेनीन घुंवडायतात आनी न्हंयबाग हांगा दावे लेनीचर येवपा खातीर डायव्हर्जन दवोरलां. थंय दिका दाखोवनी तकटे नाशिल्ल्यान केन्नाय अपघात जावपाक शकतात. थंय बॅरिकेड घालपाची सूचोवणी पेडणे तालुका विकास समितीन संबंदितांक केल्या.
बांदकाम मंत्री नीलेश काब्राल हाणे मालपें तें न्हंयबाग रस्त्याचा पळोवणी करून जीएमआर कंपनीक सूचोवणी करून रस्तो सारको करून घेवचो. पावसा पयलीं 25 मे मेरेन तो सारको केलो ना जाल्यार. सगल्या संबंदितांचें लक्ष ओडून घेवपा खातीर एक दीस लाक्षणीक उपास करपाचें व्यंकटेश नायकान थारायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
