भांगरभूंय | प्रतिनिधी
माले, खबरां संस्था : मालदीवच्या कांय मंत्र्यांनी भारताचे प्रधानमंत्री नरेंद्र मोदी आनी भारतीयांचेर केल्ले टिके उपरांत मालदीवाक भारतियांचे तिडकेक तोंड दिवचें पडिल्लें. ताका लागू मालदीवच्या पर्यटन विभागान एक निवेदन जारी करून भारताची चूक मागल्या. तशेंच तांच्या मंत्र्यांनी केल्ल्या वक्तव्यांचो निशेध केला. संकश्टाच्या काळांत भारत हो आमचे मजती खातीर सदांच उबो रावला. ह्या देशा वांगडा आमचे संबंद आमकां अशेच कायम दवरपाचे आसात. ताका लागून अशे तरेच्या वक्तव्यां पसून आमी पयस रावुया, अशें निवेदनांत म्हणलां.
मालदीव असोसिएशन ऑफ टुरिझम इंडस्ट्रीन (MATI) जारी केल्ल्या़ निवेदनांत, आमच्या कांय उपमंत्र्यांनी भारताचे प्रधानमंत्री नरेंद्र मोदी आनी भारतीय नागरिकां विशीं केल्ल्या वक्तव्याचो आमी खर निशेध करतात. भारत आमचो शेजारी आनी इश्ट देश. आमच्या पुराय इतिहासांत खुबश्या संकश्टां वेळार भारतान सगळ्यांत पयलीं प्रतिसाद दिला. भारत सरकारान आनी भारतीय नागरिकांनी आमचे कडेन राखून दवरिल्ल्या संबंदां खातीर आमी सदांच भारताचे उपकारी जावन आसात.’ अशें म्हणलां.
मालदीवच्या पर्यटन उद्देगांत भारताचें व्हड आनी सेगीत योगदान आसा. कोरोना काळांत घाल्ले निर्बंध काडले उपरांत आमी पर्यटकां खातीर आमच्या देशाचीं दारां उक्तीं केलीं. ते उपरांत मालदीवच्या पर्यटनांत भारतान खूब योगदान दिलां. दोनूय राष्ट्रां मदले इश्टागतीचे संबंद फुलत रावचे अशी आमची प्रामाणीक इत्सा. देखूनच आमच्या संबंदाचेर कसलोच वायट परिणाम जातलो अशा कृती आनी विधानां पासून आमी फुडें पयस रावपाचे.
प्रधानमंत्री मोदी हांचेर केल्ली टिका आनी भारतीय नागरिकांचेर केल्ल्या वर्णद्वेशी टिप्पण्यां उपरांत भारतीय नागरीक, कलाकार आनी खेळगड्यांनी सोशल मिडियाचेर आपलो राग उक्तायलो. तशेंच मालदीवाचेर बहिश्कार घालचो आनी पर्यटन खातीर मालदीवाक वच्चें न्हय अशें सांगिल्लें. अशे तरेन जायत्या भारतीयांनी मालदीव भोंवडी रद्द केल्या. तशेंच भारतांतल्या कांय आंतरराष्ट्रीय प्रवास कंपनींनीय मालदीवा खातीर बुकींग घेवप बंद केलां. कांय ट्रॅव्हल कंपनीनी मालदीवा खातीर लोकांनी केल्ली बुकींग रद्द केल्या. ताका लागून मालदीवांतल्या पर्यटनाक व्हडलो धपको बसपाचो आसा. देखून मालदीव पर्यटन खात्यान भारताची माफी मागल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
