भांगरभूंय | प्रतिनिधी
भारताचे प्रधानमंत्री नरेंद्र मोदी हांणी हालींच लक्षद्वीप जुंव्याक भेट दिली. थंय वेळ घालयतना प्रधानमंत्र्यांनी स्वताचे कांय फोटो काडले आनी ते सोशल मिडियाचेर शेअर केल्ले. पूण हे फोटो पळोवन मालदीवजच्या कांय फुडारी बरेच जळ्ळ्यात. लक्षद्वीपांतले प्रधानमंत्रीचे फोटो पळोवन मालदीवच्या सत्ताधारी पक्षांतल्या कांय फुडार्यांनी नरेंद्र मोदी हांचेर टिका केल्या. जाल्यार कांय फुडार्यांनी सरळ भारतीयांचेर वर्णद्वेशी टिका केली. मालदीवच्या मंत्र्यांच्या सोशल मिडिया वयले पोस्टस व्हायरल जाल्या उपरांत भारतीय नागरीक, कलाकार आनी खेळगड्यांनी तिडक उक्तायल्या. भारतीय नागरीक सोशल मिडियाचेर मालदीव सरकाराचो निशेध करतात. तशेंच ‘एक्स’ ह्या मायक्रोब्लॉगींग प्लॅटफॉर्माचेर मालदीवचेर बहिश्कार घालपाचें, तशेंच भोंवपा खातीर मालदीवाक वच्चें न्हय असो उलो मारतात. ‘बॉयकॉट मालदीव’ असो हॅशटॅगूय आयतारच्यान ट्रेंड जातना दिसता.
खुबश्या भारतीयांनी तांची मालदीव भोंवडी रद्द केल्या. तशेंच कांय ट्रॅव्हल कंपन्यांनीय मालदीव खातीर बुकींग घेवप बंद केलां. लोकांनी केल्लें बुकींगूय रद्द केलां. देशांतली व्हड ट्रॅव्हल कंपनी EaseMyTrip न मालदीव खातीर बूक केल्ल्यो विमानाच्यो सगळ्यो तिकेटी रद्द केल्यात. कंपनीचे सहसंस्थापक आनी सीईओ निशांत पिट्टी हांणी स्वता समाजमाध्यमांचेर एक पोस्ट शेअर करीत हे विशीं म्हायती दिल्या.
निशांत पिट्टी हांणी, आपल्या राष्ट्राच्या एकवटा खातीर ईजमायट्रीपान मालदीवच्यो सगळ्यो फ्लायट बुकींग्स रद्द करपाचो निर्णय घेतला.
मालदीवच्या सत्ताधारी पक्षाचे फुडारी झाहिद रमीझ हांणी प्रधानमंत्री मोदींच्या लक्षद्वीप दौर्याचेर टिका केल्ली. रमीझ हांणी म्हणलां, भारत पयशे जोडपा खातीर श्रीलंकेच्या आनी हेर ल्हान देशांच्या अर्थवेवस्थेची नक्कल करता ही दुख्खाची गजाल. तुमकां लक्षद्वीपाचें पर्यटन वाडोवपाचें आसा हें मान्य आसा. पूण, हो एक भ्रम. आमी (मालदीव) दितात तशीच सेवा लक्षद्वीपांत तुमी दिवंक शकतले? तुमी नितळसाण पाळपाक शकता? थंयच्या हॉटेलाच्या कुडींनी एक खाशेलो वास येता, ताचें तुमी कितें करतले?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
