भांगरभूंय | प्रतिनिधी
बेकायदो बांदकामां, मसुंडी, आवाज प्रदुशणाचेर चर्चा
भांगरभूंय । प्रतिनिधी
शिवोलीः बेकायदो बांदकामाच्या विशयाचेर मार्ना शिवोली ग्रामसभेंत चर्चा चलतना प्रकरण हाताभायर वचपाक लागलें. ताका लागून पंचायत मंडळाक पुलिशेचो आदार घेवचो पडलो. आयतारा जाल्ले मार्ना शिवोली ग्रामसभेंत विवीध विशयांचेर वादळी चर्चा जाली.
पंचायत कार्यालया लागसारच्या मिनी सभाघरांत आयतारा सकाळीं ग्रामसभा आयोजीत केल्ली. सरपंच शर्मिला वेर्णेकार, उपसरपंच विलियम फर्नांडीस, पंच अमीत मोरडकार, सिंपल धारगळकार, अभय शिरोडकार, शोभावती चोडणकार, मनोरमा गोवेकार, फेर्मिना फर्नांडीस आनी संदेश हडफडकार ग्रामसभेक हाजीर राविल्ले.
ग्रामसभेंत कसलीच वायट घडणूक घडची न्हय हे खातीर पुलीस लेगीत दवरिल्ले. ह्या वेळार विवीध विशयांचेर चर्चा जाली. बेकायदो बांदकामाचो विशय अमृत आगरवाडेकार हांणी ग्रामसभेंत मांडलो. ह्या वेळार आगरवाडेकार हांचें पंचायत मंडळा वांगडा तोंड वाजलें. परिस्थिती नियंत्रणा भायर वता तें पळोवन पुलिशेक सभाघरांत आपयले. ग्रामसभा आनी पुलिशेचो मान राखपा खातीर आपुणूच सभाघरा भायर गेलों, अशें आगरवाडेकार हांणी उपरांत पत्रकारां कडेन उलयतना स्पश्ट केलें.
रस्त्या कुशीक उब्यो आशिल्ल्या गाडयांचेर चर्चा जाली. दांडा वाठारांतले मसुंडीचोय प्रस्न चर्चेक आयलो. हे मसुंडेचें काम पुराय जाल्ल्याचें पंचायत मंडळान सांगताच लोकांनी ताका खर हरकत घेतली.
ह्या वेळार प्रदीप पोंबुर्फेकार हांणी मसुंडे विशींची सत्यस्थिती ग्रामसभेंत मांडली. 9 लाख 80 हजार रुपया खर्च करून मसुंडेचें काम अर्दवट केल्ल्याचो तांणी दावो केलो. कंत्राटदारान फक्त मनमानी केल्या. पुराय कामाची ताकतिकेन चवकशी करची आनी संबंदीत कंत्राटदाराक काळे वळेरेंत घालचो, अशी मागणी हे ग्रामसभेंत केली. ह्या वेळार थळाव्या लोकांक घेवन ते मसुंडेची पळोवणी करतले, अशें उतर पंचायत मंडळान दिलें.
हॉटेलांत चलपी संगीत रजनीक लागून जावपी आवाज प्रदुशणाचोय प्रस्न चर्चेक आयलो. ताचेर खर उपाय येवजण करपाची मागणी थळाव्या लोकांनी केली.
वीज पुरवण आनी हेर विशयांचेर चर्चा जाली. तार बाजारांतलें शौचालय नव्यान बांदतले, अशें सरपंचान स्पश्ट केलें. भलायकी खात्याक विस्वासांत घेवनूच शौचालयाचें काम करचें, अशी सुचोवणी थळाव्या लोकांनी पंचायत मंडळाक केली. पंचायत वाठारांत बिगर गोंयकारांचो आंकडो वाडला. ताका लागून खूबश्यो समस्या निर्माण जातात. ताचेर पंचायतीन उपाय येवजण करची, अशी मागणी ग्रामसभेंत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
