मार्च 2024 यूपीआयचो नवो विक्रम: 1,344 कोटी वेव्हारा वरवीं 19.78 लाख कोटी रुपयांचें हस्तांतर

भांगरभूंय | प्रतिनिधी

नवी दिल्ली, खबरां संस्था ः मार्च 2024 वर्सा युनिफायड पेमेंट्स इंटरफेस म्हळ्यार यूपीआय वरवीं वेव्हाराचो नवो रेकॉर्ड तयार जालो. ह्या काळांत 1,344 कोटी वेव्हारा वरवीं 19.78 लाख कोटी रुपयांचें वेव्हार जाले. फाटल्या म्हयन्यांत म्हळ्यार फेब्रुवारी 2024 वर्सा यूपीआय वरवीं 1,201 कोटी वेव्हार जाले, जाचे वरवीं 18.28 लाख कोटी रुपया हस्तांतरित जाले.
फाटल्या वर्सा मार्च म्हयन्याचे तुळेंत वेव्हारांत 55.35 टक्क्यांनी वाड जाल्या आनी हस्तांतरीत केल्ल्या रकमेंत 40.81 टक्क्यांनी वाड जाल्या. फाटल्या वर्सा मार्चांत 14.05 लाख कोटी रुपयांचो वेव्हार जाल्लो.
त्याच वेळार 2023-24 अर्थीक वर्सा ह्या पेमेंट सुविधा वरवीं 13 हजार कोटीं वयर वेव्हार जाले. ह्या वेव्हारांतल्यान लोकांनी 199.95 लाख कोटीचो वेव्हार केलो. 2022-23 अर्थीक वर्सा परस हें 43.68% चड आसा.
प्रधानमंत्री नरेंद्र मोदी हांणी अंदूं फेब्रुवारींत श्रीलंका आनी मॉरिशसांत यूपीआय म्हळ्यार ‘युनिफायड पेमेंट इंटरफेस’ सेवा सुरू केल्ली. तशेंच फ्रांसांतल्या भारताच्या दूतावासान 2 फेब्रुवारीक पॅरिसांतल्या आयफेल टॉवर हांगा युनिफायड पेमेंट इंटरफेस (यूपीआय) सुरू केलें.

मजगतीं, आरबीआयचे गव्हर्नर शक्तिकांत दास हांणी शुक्रारा (ता. 5) 2024-25 अर्थीक वर्साचें पयलें चलन धोरण जाहीर करतना यूपीआय संबंदी व्हड घोशणा केल्या. आतां रोखडेंच युनिफायड पेमेंट्स इंटरफेस म्हळ्यार यूपीआय वरवीं रोख जमा करपाक मेळटली.