भांगरभूंय | प्रतिनिधी
अंदूं फेब्रुवारी संवसारभरांत सगळ्यांत उश्ण म्हयनो
नवी दिल्ली, खबरां संस्था ः मार्च म्हयनो हवामानाचे नदरेन सामको विचित्र आसतलो असो अदमास आसा. सादारणपणान ह्या म्हयन्या सावन गिमाळ्याक सुरवात जाता. पूण ह्या वर्सा ह्या म्हयन्यांत हवामान अस्थीर उरूंक शकता. मार्च म्हयन्यांतल्या फुडल्या तीन सप्तकांत रातीं उश्ण आनी दिसाचें सामान्य तापमान आसूं शकता असो अदमास आसा. तशेंच म्हयन्याचे अखेरेक ९ ते १० राज्यांनी उश्णताय ल्हार येवपाची शक्यताय आसा. 10 मार्चाचे रातीं सावन हिमालयाच्या वाठारांत नवो अस्तंती अडचण सक्रिय जातलो अशें हवामान शास्त्रज्ञ सांगतात. हाका लागून हवामानांत बदल जावंक शकता. ताका लागून 10 ते 13 मार्च ह्या काळांत जम्मू-काश्मीर, लडाख, हिमाचल प्रदेश आनी उत्तराखंडांतल्या कांय वाठारांनी हलको ते मध्यम पावस आनी उंचेल्या वाठारांनी बर्फ पडपाची शक्यताय आसा. उत्तर भारत ते मध्य भारत मेरेनच्या वाठारांनी 14 मार्च मेरेन अस्तंत अडचणीचो परिणाम उरतलो. हाका लागून कांय वाठारांनी एक तर ढगाळ वातावरण आसतलें वा पावस पडटलो. पूण 15 मार्चा सावन हवामानांत बदल जावपाची शक्यताय आसा. हाचे उपरांत निमाणे सप्तकांत देशभरांत रातचें तापमान वाडपाची शक्यताय आसा.
मजगतीं, युरोपी संघटनेचे हवामान बदल संघटणेन सांगलां की, अंदूं फेब्रुवारी संवसार भरांत सगळ्यांत उश्ण म्हयनो आसून तापमान 13.5 अंश सेल्सियस आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
