भांगरभूंय | प्रतिनिधी
दोडामार्ग, प्रतिनिधी : कोल्हापूराक खाजगी हॉस्पिटलांत उपचारा खातीर दाखल आशिल्ल्या घोवा वांगडा आपल्या ल्हान पुताक दवरून बिरेस्तारा ‘मार्गशीश बिरेस्तार’ पुजपा खातीर घरा परतपी बायलेक अपघातांत मरण आयलें. ओझरी- पेडणेंची (गोंय) शुभांगी शिवा परब (६०) अशें ते बायलेचें नांव. आपल्या व्हडल्या पुता सयत स्कॉर्पिओ गाडयेन येतना अचकीत तांची गाडी कानालांत गेली आनी ह्या अपघातांत तिका मरण आयलें. तिचो पूत जखमी जालो. सचीन शिवा परब अशें ताचें नांव. साटेली भेडशी भोमवाडी हांगा बिरेस्तारा सकाळीं सुमार २.४५ वरांचेर हो अपघात घडलो.
शुभांगी हिचो घोव शिवा हे गोंयच्या शिक्षण विभागांत कार्यरत आशिल्ले. हालींच ते सेवानिवृत्त जाले. तांची भलायकी इबाडिल्ल्यान तांकां कोल्हापूराक एका खाजगी हॉस्पिटलांत चार दिसां पयलीं उपचारा खातीर दाखल केल्ले. तांचो व्हडलो पूत सचिन हो गोंयांत फायर ब्रिगेडींत कामाक आसा. बापायचे भलायकेची विचारपूस करची आनी मार्गशीर्श म्हयन्याचो बिरेस्तार आशिल्ल्यान लक्ष्मीपूजन करपाक आवयक घरा हाडचे खातीर सचिन ल्हान भावाक घेवन मामाच्या महिंद्रा स्कॉर्पिओ गाडयेन बुधवारा कोल्हापुराक गेल्लो. उपरांत सांजेवेळार शुभांगी हांणी ल्हान पुताक घोवा वांगडा दवरून व्हडल्या पुता सयत घरा परतपाक थंयच्यान भायर सरली. स्कॉर्पिओ गाडी दिवन, उपरांत आपली गाडी घेवन घरा वतले ह्या हेतान तीं भेडशी भोमवाडी ह्या मार्गान कुडाशें वानोशीवाडी हांगा वतालीं. येतना वाटेर झेम येवची न्हय म्हूण तीं गजालीं मारीत येतालीं. साटेली- भेडशे भोमवाडी मुखेल रस्त्या कडल्या तिळारीच्या दाव्या कानाला लागसारा तांची गाडी पावली. तेन्ना आवय ओगी कित्याक आसा? उलो मारलो तरी तिणें आवाज दिवंक ना म्हणून भियेवन सचिनान फाटल्यान वळून पळयलें. तेन्ना गाडयेवेलें नियंत्रण सुटलें आनी गाडी सरळ कानालांत कोसळ्ळी. फाटल्या सिटार बशिल्ली शुभांगी परब सरळ उडून गाडयेच्या मुखारल्या हारश्याक येवन आदळ्ळी आनी तिका नेटान मार बसलो.
कानालांतल्यान उदकाचो प्रवाह चालूच आसलो. ताका लागून गाडी उदका वांगडा व्हांवपाक लागली. सचिन धिटायेन गाडयेंतल्यान भायर आयलो आनी आवयकूय गाडयेंतल्यान भायर काडपाचे बरेच येत्न केले. ती येना तें पळोवन ताणें कानालांतल्यान भायर येवन आशिकुशीकच्या लोकांक उठोवन हाडले. तातूंतच ताचो वेळ गेलो. लोकांनी येवन आवयक गाडयेंतल्यान भायर काडून गाडयेच्या टॉपार दवरली. उपरांत सचिनान थळाव्यांचे मजतीन शुभांगी हिका साटेली- भेडशी मुळाव्या भलायकी केंद्रांत दाखल केली. मात हिका मरण आयिल्ल्याचें वैजकी अधिकार्यांनी सांगलें.
कानालाच्या उदकाचो प्रवाह बंद केलो
अपघात जाले उपरांत थळाव्यांनी रोखडेंच जलसंपदा विभागाच्या अधिकार्यां कडेन संपर्क केलो. तशेंच अपघाता विशीं सांगून कानालांतलें उदक बंद करपाची मागणी केली. अधिकार्यांनीय वेळ वगडायनासतना उदकाचो प्रवाह बंद केलो. मात अपघाताक लागून गाडी सुमार ५० मिटर व्हांवून गेल्ली. अपघाताची म्हायती पुलिसांक मेळटांच तेय रोखडेच घडणुके सुवातेर दाखल जाले. तांणी येवन पंचनामो केलो.
कानालांत गाडी पडले उपरांत ते गाडयेंत सगळें उदक गेलें. ताका लागून ती भायर कशी काडची? असो प्रस्न निर्माण जालो. कांय थळाव्या तरणाट्यांनी फुडाकार घेवन गाडी १०० मिटर धुकलून व्हेली. उपरांत दुसरे गाडयेचे मजतीन गाडी कानालांतल्यान भायर काडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
