मार्गदर्शी मुख्यमंत्री, संरक्षण मंत्री

भांगरभूंय | प्रतिनिधी

गोंयाक राज्य पांवडो फावो जातना जापसालकी वाडली आनी आमदारांचे भत्ते, पगारय वाडले. राज्याक पयल्या
दसकांत मेळिल्ले मार्गदर्शी मुख्यमंत्री मनोहर पर्रीकार हांचो तो निर्णय. त्या निर्णयान फक्त गोंयच्या न्हय देशांतल्या लोकप्रतिनिधींचे पगार, भत्ते वाडले. कसल्याय मुखेल धोरणात्मक निर्णया पयलीं पक्ष विरयत लोकप्रतिनिधीं कडेन ते भासाभास करताले. निमाण्या पावंड्यार अधिकारी, वरिश्ठ लोकप्रतिनिधींक विस्वासांत घेवन विधेयक मांडटाले. समेस्तांनी केल्ले टिकेक जाप दिवपाची तांक तांचे मदीं आशिल्ली. अणभवान ते शाणे जायत गेले आनी टिकाकारांक जापोय दिवप तांणी बंद केलें. एकचित्त जावन कायदे करून गरज पडल्यार ते सुदारप जैता कडेन व्हरपी आसता. ही देख तांणी घालून दिली. तेखातीर प्रधानमंत्री नरेंद्र मोदी हांचे सयत सगल्यांनी तांची तोखणाय केल्या.
आमदारांचो पगार, भत्ते, कर्मचारी वाडयतना तांचे कडल्यान चुकोय जाल्या आसत जाल्यार त्यो सुदारच्यो, बदलय करचे. गोंय राज्य जाल्ल्यान सरकाराक केंद्रा कडल्यान पयसोय चड मेळटा. आमदारांचो पगार वाडयल्यार तो लोकां मेरेन पावतलो, नरकासूरांक न्हय कृष्णांक मेळटलो हाची जतनाय घेवची हें तांणी भाशणांतल्यान शिकयलें. . “नरकासूर करूं नाकात, कृष्ण करात हांव म्हज्या बोल्सांतल्यान पन्नास हजार रुपया दितलों.” हीं मनोहरबाबांची उतरां नरकासूर सर्तीच्या इनामां वांटप कार्यावळींतलीं. आमदारां कडेन पयशे मागपाक दीसपट्टे येवपीय आसतात. म्हजे कडेनय ते येतात हीं उतरांय आदल्या मुख्यमंत्र्यांचींच.
विधानसभेंत आमदारांक पयलेच फावट पगार, भत्ते वाडोवन दिवपी विधेयकाक मान्यताय घेतना, विरोधी पक्ष मुखेली आसतना ते अभ्यास करुन उलयताले. तेच पद्दतीन मुख्यमंत्री म्हूण जापोय दिताले. आवाजांत बदल आसतालो, मुखामळार जापसालकेची सया सभाघराचे फुडारी, बापूय म्हणून. हुसक्या विरयत राजकी वावराक तांकां सदांच उमेद मेळ्ळी ती आदले मुख्यमंत्री प्रतापसिंह राणे हांचे कडल्यान. मेकळेपणान तशें तांणी विधानसभेंतय सांगलां.
विधानसभेंत विधेयकां मांडटना, विधेयकाक मान्यताय घेतना कायद्याचें गिन्यान तांकां दिवपी हजार. विधेयक कायद्याचे मान्यतायेक वच्चे आदीं अर्थकारणाचो विचार करचो पडटा. ते विशीं म्हायती विधेयकांत आसता.
विधेयकाचो अर्थ कळ्ळो ना जाल्यार ती घेवपाक जाय. कालचे पत्रकार एकोडे वचून म्हायती मेळोवपी, वाचन करपी, जागोवपी. त्या पत्रकारां खातीर आदल्या मुख्यमंत्र्यांनी केल्ली गोंय पत्रकार कल्याण निधी येवजण केंद्र सरकारान आपणावपा सारकी. मात ते आदीं पत्रकार कोण हें कायद्यांत बदल हाडून विधेयका वरवी सांगचें पडटलें. तेन्नाची गोंयांतली पत्रकारिता दिसाळ्यांतली, भोवमाध्यमी नाशिल्ली. तरी लेगीत केरळ राज्याचे धरतेर गोंयच्या पत्रकारां खातीर केल्ली कल्याणनिधी येवजण मार्गदर्शीच. बदलां कडेन व्हरपी, पळोवपी. फक्त विधिमंडळ कामकाज करपी पत्रकारां खातीर ती नाशिल्ली तर संपादप्यांकय उपेगाची. त्या त्या राज्यांनी वीस पंचवीस वर्सां दिसाळ्यांनी, माध्यमांनी अखंडीतपणान वावुरिल्ल्या पत्रकारांकच ती मेळची ही मोख. पत्रकारां पासत केल्ले ते येवजणेंत पत्रकारांनीय पयसो घालचो हें केरळेचे येवजणेचें सुत्र तेन्नाच्या मुख्यमंत्र्यांनी, पत्रकारांनीय आपणायलें. तेंच सुत्र देश पांवड्यारय आपणावपाक जाय.
दर्यादेगेच्या वाठारांनी, शारांनी गोंयांत कोयर वाडटा तेन्ना साळगांव गोंयचो पयलो कोयर वेवस्थापन प्रकल्प जालो. मोपा विमानतळ, पणजी स्मार्ट सिटी येवजण मार्गाक लागली. बुन्यादी, उक्तावणां, बुन्यादीच्या वावराची बुद्धिमता मार्गदर्शी मुख्यमंत्र्यांची.
गांवच्या कोयर, घाणयाऱ्या उदकाचें अरिश्ट कित्याक आयलां? पंचायतींत, नगरपालिकांनी संगीत खुर्चेचो खेळ चलला? जिल्हो पंचायतींक अधिकार अजून मेळूंकना, अधिकारांचें विकेंद्रीकरण ना अशी परिस्थिती आसा? अर्थसंकल्पाच्यो बसको घेतना मुख्यमंत्री डाॅ. प्रमोद सावंत हांकां जापो मेळटल्यो. 12 वर्सांच्या भाजप सरकाराचे राजवटीचो नियाळ तांणी घेवचो. डाॅ. सावंत आतां मेरेन मार्गदर्शी मुख्यमंत्र्यांचेच वाटे वयल्यान चलतात. पन्नास वर्सां पयलींच्या केंद्रीय नगरपालिका, पंचायत, जिल्हो पंचायत कायद्यांनी बदल करपाची मागणी तांणी केंद्र सरकारा कडेन करची खासदारां वरवीं.
मोपा विमानतळ पुराय जालो, नांव मार्गदर्शी मुख्यमंत्र्यांचें. मोपा विमानतळांतल्यान पेडणें तालुक्याची उदरगत जाल्या, विमानतळार आवाज करिनासतना विमानां देंवतात. मूळ येवजणे प्रमाण क्रांती हाडपी बदल घडटात. नव्याक येवकार दितना ज्येश्ठांक सांबाळपाक येवजण हाडपाची धिटाय मार्गदर्शी मुख्यमंत्र्यांनी दाखयली. धा सरकारी येवजण्यांचो लाव एकलोच घेवन लखपती जाता? सर्वेक्षण नियाळांतल्यान विधानसभे मुखार आयलें मार्गदर्शी मुख्यमंत्र्यांच्या तेंपार. म्हयन्या भितर कारवाय जाली.
पदवी मेरेन शिक्षण ना पूण ताळगांव पंचायत सांबाळिल्ले महसूल मंत्री आतानासियो (बाबूश) मोंसेरात हांकां विधानसभेची वाट मार्गदर्शी मुख्यमंत्र्यांनी दाखयिल्ली. त्याच बाबूश हांणी सरकारांत अस्थिरताय हाडपाचे येत्न केले. विधानसभा विसर्जनाचो थाराव धाडपाचें कामकाजय पणजेच्या आदल्या आमदारांचें. पणजी पुलीस स्डटेशन फोडलें तेन्ना बंदखणीत वच्चे आदीं बाबूश हांकां बळ मार्गदर्शी मुख्यमंत्र्यांनी दिलें. घडणुके फाटलें राजकारण कळ्ळें तेन्ना ताळगांवच्या आदल्या आमदारांचेर बडीय तांणी मारली. ताळगांव पंचायत वाठार सांबाळून पणजी म्हापालिका जल्मली मार्गदर्शी मुख्यमंत्र्यांच्या तेंपार. कोयर, पे पार्कींग वेवस्थापनात तीच म्हापालिका नगरपालिकांक आदर्श थारता, पंचायतींनी तोच मार्ग कित्याक आपणावचो न्हय?
मुख्यमंत्री नासतना कोयर वेवस्थापनाचे खासा ट्रक पणजी म्हापालिके मेरेन पावोवपी मनोहरबाब आयज आशिल्ले जाल्यार केंद्रीय अर्थ मंत्री, गृह मंत्री जावपाचे. मार्गदर्शी संरक्षण मंत्री म्हणून केल्ल्या वावराचेर तांचें नांव प्रधानमंत्रीपदा खातीर पयलें आसपाचें.
मुख्यमंत्र्यांनी फक्त पद सांबाळ्ळें म्हूण जायना तांणी सदां सादूर (अलर्ट) रावचें पडटा. गृह, अर्थ खातीं सांबाळून अर्थकारणाक आनी गृह खात्याक वेगळ्या मोडणार पावोवपाचो वावर कसो करचो तें मार्गदर्शी मुख्यमंत्र्यांनी दाखोवन दिलां.
मुख्यमंत्र्यांनी गरजेक वेळार म्हत्वाचे निर्णय घेवपाक फाटीं रावंक जायना हीय देख मार्गदर्शी मुख्यमंत्र्यांची. आदल्या मुख्यमंत्र्यांची सकारात्मकतेची देख संवसाराची जाल्या. घरावे अन्न इफ्फी वेळार गोंया भायल्यान राज्यांत येतल्यांक मेळचें. गोंयचे शीत कडयेंतल्यान सिनेमा सहकारी तत्वान घडचो ही तांची मोख इफ्फी गोंयांत हाडटना आसली. आयज कोयर, घाणयारें उदक, म्हेळ्य़ो पासयो घराव्या अन्नाकय म्हारग पडटात. ल्हान दुकानां, कॅण्टिनां घराव्या अन्ना पासत तेखातीर उक्तीं करचीं पडटलीं, पासयो नितळ करच्यो पडटल्यो. घराघरांनी कोयर वेवस्थापन जावचें हो पणजेचो आदर्श गांवांनी, दुकानांनी, फॅक्टरींनी पावोवपाक तांणी केल्लो कायदो आसा. त्या कायद्यांत बदल करचो. प्लास्टिकाचेर पुराय बंदी घालून, ती चालीक लावपी यंत्रणा शिस्तीन बळिश्ट करुन मार्गदर्शी मुख्यमंत्र्यांक आर्गां ओंपपाक जाय. आपलो वाडदीस दिव्यांगां वांगडा मनोवन दिव्यांग खातें देश पांवड्या वेल्यान राज्या मेरेन पावोवपाक तांणी जैत मेळयलें.
कला आनी संस्कृती खातें, कोयर वेवस्थापन म्हामंडळ, साधनसुविधा विकास म्हामंडळ, मनरिजवण सोसायटी मार्गदर्शी मुख्यमंत्र्यांच्या तेंपार जल्मल्लीं. आदल्याक नवें रुप, रंग दिवन जल्मल्ल्या खात्यांत आत्मनिर्भरता हाडपाचो होच वगत. तेंय करतना आदले 25 टक्के, 75 टक्के नवें तंत्र आपणावचें. कला अकादमीक मार्गदर्शी म्हणून दवरतना मार्गदर्शी मुख्यमंत्र्यांनी तें केलें. तीच नवी वाट, दिका.

सुहासिनी प्रभुगांवकार
9881099260