भांगरभूंय | प्रतिनिधी
केंद्रीय मंत्री श्रीपाद नायक हांकां लोकसभेची उमेदवारी मेळिल्ल्यान पत्रकार सतीश नायक भोव खोशी आसा. कांय दिसां आदीं श्रीपादभाऊंक तिकेट मेळटली काय ना तें सांग, अशें म्हाका तो मोबायलार उलयतना विचारी. म्हाका श्रीपादभाऊंच्या उमेदवारीचें कित्याक विचारता? म्हजो प्रश्न. म्हाका फकत श्रीपादभाऊंक तिकेट (साॅरी उमेदवारी) मेळटली काय ना तें सांग? परतून सतीशान विचारतकीच म्हजेंय विचारचक्र बदललें. म्हज्याच न्ही आमच्या तेंपा वेल्या पत्रकार पिळगेचो, मिडीयाचो मार्गदर्शक सतीश आयज 75 वर्सांचो जाता. ल्हानात ल्हान जावन ताचो जल्मदीस ल्हानशा सुवाळ्यांत मनयतना सतीश, तूं आतां साहित्यांतल्यान व्हड जा, अशें हांव ताचे लागीं मागतां.
सतीश नायक ह्या नांवांची आनीकय व्यक्तीमत्वां आसत, पूण पत्रकार सतीश एकलोच. विधानसभा नियाळांतल्यान बातमीदारांक पणजे आकाशवाणीर व्हरपी.
साडेतीन दसकां आदीं पणजे आदल्या सचिवालयांतल्या प्रेस रुमांत म्हजी आनी सतीशाची वळख जाली. सांजवेळा 4, 4.30 जातकीच पत्रकारांचो एक पंगड सचिवालयांत अधिकारी, मंत्र्यांक मेळपाक सदां तेन्ना वतालो. वांगडा आकाशवाणीचेर बातमीदार म्हणून कामाक आशिल्लो सतीश. बातमी मेळ्ळी की प्रेस रुमांत येवन फोना वेल्यान ती आकाशवाणीचेर सगळ्यांत पयलीं दिवपाचो वावर ताणे केला. विधानसभा अधिवेशनाचो नियाळ बरोवन आकाशवाणीचेर वाचपाक सतीशान म्हाकाय शिकयलें. मराठीमोगी ज्येश्ठ पत्रकार गुरुदास सावळ, र. वि. प्रभुगांवकार, सागर जावडेकार हाणींय आकाशवाणी खातीर कोंकणींतल्यान विधानसभेच्या कामकाजाचो नियाळ बरयला. तें काम करुन घेवपी सतीशूच.
विधानसभा अधिवेशनाच्या कामकाजाचो नियाळ बरोवप सोंपें न्हय. बरोवन जातकीच तो अचूक आसा काय ना, हें कामय आकाशवाणीचेर वृत्त फांट्यात आशिल्ल्या अधिकाऱ्यांक करचें पडटा. नियाळ कितल्या मिनटांचो, पानांचो आसचो, तो कसो बरोवचो, वाचचो तें शिकयतना रेकाॅर्डिंग करुन घेवपा वेळार सतीश बरोबर रावतालो. पत्रकार म्हणून आमचे वांगडा कार्यावळींक, पत्रकार परिशदेक, विधानसभा अधिवेशनाक हजेरी लावपी सतीशा कडेन यादीचें व्हड गांठवल आसा. वगत आयला तें सोडोवपाची.
सतीश आमचो पणजे पाटो काॅलनीत रावतना शेजारी. सक्काळीं उठून आकाशवाणीर धांवतना, मानसी, हर्ष हांकां शाळेच्या बशीच्या बसस्टाॅपार पावयतना, हाडटनाय बातमे फाटल्यान लागपी सतीश हांवें पळयलां. ल्हान, व्हड दुयेंसा कडेन झुजत सतीश आज 75 वर्सांचो जाता, तेन्ना ‘तुम जियो हजारों साल, साल के दिन हो पचास हजार’ अशेंय हांव म्हण्टा.
भुरग्यां बरोबर भुरगो जावन खेळपी भुरग्यांचो सतीशकाका मूळ म्हापशेंकार, राबितो पर्वरे. गोंयांतच न्हय देसभरांतय ताचे व्हडा संख्येन इश्ट आसात. निवृत्ती उपरांतय भारताच्या आंतरराष्ट्रीय चित्रपट महोत्सवा खातीर तो (इफ्फी) वावुरला. सरकारी अधिकारी म्हणून वावुरतना बंधनां येतात. बंधनांचे फास्केंत रावन खबरो इंग्लीश, मराठी, कोंकणींतल्यान आकाशवाणी, दूरदर्शन, पत्रकारां मेरेन पावयतना संपादप्यां मेरेन तो वचपी. सतीश एक बरो अनुवादक, मंत्र्यांची भाशणांय बरोवन दिवपी. सतीशाची घरकान्न मीना हें बरें गायक, आदलें सरकारी अधिकारी.
गोंय श्रमिक पत्रकार संघटणेचो वेंचणूक अधिकारी म्हणून बरींच वर्सां कामकाज करपी सतीश ज्येश्ठ पत्रकार संघटणेचो आतां अध्यक्ष.
इश्ट, इश्टीणींचे वाडदीस याद दवरपी, तांचें बरें मागपी. ताचो अमृत महोत्सवी वाडदीस मनयतना ज्येश्ट पत्रकारांचो एकवट, गोंयचो सैम तिगोवपाचो सोपूत आमी घेवया.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
