भांगरभूंय | प्रतिनिधी
दर वर्सा नोव्हेंबराच्या पयल्या आयतारा माय दोस पोब्र ( Mae Dos Pobres) सायबिणीचें फेस्त नुवें गांवचो लोक मनयतात. जर पयलो आयतार ‘सगळ्या आत्म्यांच्या दिसा’ म्हणल्यार 2 नोव्हेंबराक पडटा जाल्यार फेस्त ताच्या फुडल्या आयतारा मनोवप जाता. पांचवेचार झाडा- पेडांनीं, ल्हान- ल्हान दोंगुल्ल्यांनी, वार्या सांगाता धोलपी लांब माडांनीं तशेंच शितळ उदक व्हांवपी साळ न्हंयेचे देगेर नुवेंचो गांव वसला.
सैमीक गिरेस्तकायेन भरिल्ल्या ह्या नुवेंच्या गांवांत सतराव्या शेकड्यांत 1695 वर्सा दोना टॅल्मा क्लारिस्सा दा कोस्ता लॉरेंसो (Dona Telma Clarissa Da Costa Lourenco) ह्या भाटकान्नीच्या घराब्यान सोबीत, कलात्मक कपेल बांदून घेतलें. तें खासगी कपेल आशिल्यान ताच्या कुशीक तांणी एक ल्हान विसव घेवपाची कूड बांदली. तांणी तें कपेल जेजू मारी जुजे (Jesus Maria Jose) ह्या पवित्र घराब्याक भेटयलें आनी उपरांत कांय वर्सांनी तें मडगांवचे स्प्रीत सांताचे (Holy Spirit) इगर्जे खाला वावर करतालें. 1903 वर्सा जेजू मारी जुजे कपेलाक इगर्जेचो दर्जो मेळ्ळो. नुवेंच्या क्रिस्तांव भावार्थ्यांची संख्या वाडत गेली देखून एक व्हड इगर्ज बांदपाचो थाराव मान्य जालो. नुवेंच्या लोकांनी नवी इगर्ज बांदून 30 डिसेंबर 2023 दिसा तिचें उकतावण केलें.
आदीं सावन, नुवेंचो लोक खणकाम आनी रस्त्याचें काम करताले. तें गोंयभर वावुरताले. पूण दर वर्सा, घराब्याच्या सोंपून गेल्ल्या वांगड्या पासत मागूंक नोव्हेंबराचे 2 तारखेर ‘सगळ्या आत्म्यांच्या दिसा’ निमतान घरा परतताले. अशें म्हणटात की नुवेंचो लोक वर्सभर कश्ट करून ‘सगळ्या आत्म्यांच्या दिसा’ उपरांतच्या फुडलें सप्तक भर आपल्या घरा रावून विसव घेतालो आनी ताच्या फुडल्या आयताराक माय दोस पोब्र सायबिणीचें फेस्त मनयताले. घडये हे चालीक लागून हे सायबिणीचें देवोसांव सुरू जालां आसपाक जाय. ‘माय दोस पोब्र’ म्हणल्यार ‘गरिबांची आवय’. तिका ‘दुर्बळांची आस्कारीण’ अशेंय म्हणटात. नुवेंचो सादो लोक व्हडा भावार्थान आनी भक्तीन सायबिणी लागीं मागणीं करता.
माय दोस पोब्र सायबिणीक हें नांव कित्याक पडलें, हाचे फाटल्यान एक काणी आसा. ती अशी, माय दोस पोब्र सायबीण पयलेच फावटी मॅरिएट बेको (Mariette Beco) ह्या इकरा वर्सांच्या भुरग्याक 15 जानेवरी 1933 दिसा बेल्जियम देशांत सांजेच्या सुमार सात वरांचेर ताच्या घराच्या बागेंत दिश्टी पडिल्ली. मॅरिएट ही क्रिस्ती कामगार कुटुंबांतली सात भावंडां मदलीं व्हडली धूव. ताचो बापूय जुलियन बेको एक बेरोजगार वायर तयार करपी आशिल्लो आनी ताणें मिसाक वचपाची परंपरा खूब वर्सां आदीं सोडून दिल्ली. मॅरिएटाची आवय लुईस (Louise) लेगीत धर्माक चड म्हत्व दिनाशिल्ली. मॅरिएट लेगीत कुटुंबाच्या हे परिस्थितीक लागून दोन म्हयने इगर्जेंत वचूंक नाशिल्लें. तशेंच दोतोन्निच्या (क्रिस्तांव धर्माची शिकवण) वर्गांत ताका हाजीर रावपाक कठीण जातालें. देखून पयल्या कुमिन्यांवा खातीर ज्यो सुचोवणयो दितात त्यो ताका चुकल्यो.
मॅरिएटाक सायबीण आठ फावटी वेग-वेगळ्या दिसा दिश्टी पडिल्ली. ‘अवर लेडी ऑफ बॅन्यक्स’ (Banneux) हिणें मॅरिएटाक निमणे फावट 2 मार्च 1933 दिसा भेट दिल्ली. तिसरे भेटेक तिणें मॅरिएटाक “I am the Virgin of the Poor” अशें म्हणून प्रकट केलें. देखून 14 ऑगस्ट 1956 दिसा तिचें नांव ‘अवर लेडी ऑफ बॅन्यक्स’ (Banneux) सावन बदलून ‘अवर लेडी ऑफ पुअर’(Poor) केलें. मॅरिएटान सांगिल्ले प्रमाण, ताका सायबिणीचो आविश्कार घडलो तेन्ना तिणें निळो पट्टो आशिल्लो धवो गावन घाल्लो. पूण आतां जी माय दोस पोब्र सायबिणीची मुर्ती जेजू मारी जुजे इगर्जेंत आसा तिका भांगराळी तपकिरी रंगाची न्हेसवण आसा. संस्कृतीक विविधतायेक लागून हो बदल घडला आसतलो असो आमी तर्क लावंक शकतात.
साश्ट म्हालांतले, वेग-वेगळ्या धर्मांचे लोक माय दोस पोब्र सायबिणीचें बेसांव घेवंक तिच्या फेस्ताक येतात. जो मनीस भावार्थान मागता ताचें मागणें तीं आयकता, अशी श्रद्धा आसा. ह्या वर्सा फेस्त नोव्हेंबराचे 3 तारखेर म्हणल्यार आयज मनयतात. फाटल्या णव दिसांच्या नोव्हेनांनी भावार्थ्यांनी मोठ्या संख्येन वांटो घेतिल्लो. इगर्जेंत एक चाल आसा, दर वर्सा नोव्हेनां दिसानीं लोक आपल्या लागीं घडटा ते भशेन गरीब लोकां पासत तांदूळ, साकर, नाल्ल, कपडे आनी हेर भेटवस्तू इगर्जेच्या वडिलां कडेन लागीं हाडून दितात आनी फेस्ता उपरांत ह्यो वस्तू गांवच्या गरजेवंत कुटुंबांक वांटप जातात. फेस्ता दिसा परबेच्या दबाजीक मिसा उपरांत माय दोस पोब्र सायबिणीच्या मुर्तीचें पुरसांव काडटात. गांवचो लोक तशेंच हेर भावार्थी ह्या पुरसावांत वांटो घेतात. सांजे वेळार जांकां इत्सा आसता तांकां सायबिणीचो उमांव घेवंक मेळटा. सायबिणीन फावो केल्या देण्यां पासत लोक तिका फुलां- वाती भेटयतात. फेस्ताची मांडावळ करूंक इगर्जेच्यो जायत्यो संस्था वावुरतात.
फेस्ताक इगर्जे कुशीच्या मळार व्हड फेरी भरता आनी ती सात दीस उरता. आदीं नुवेंचें फेस्त चड फामाद आसलें कारण हांगा गाय, बैल, म्हशी ह्या गोरवांचो वेपार जातालो. आतां तो जायना पूण मातयेचीं आयदनां, कपडे, मदेराचें सामान मेळटा. नुवेंचे हें फेस्त ह्या हंगामांतलें पयलें फेस्त, जंय मदेराची व्हड फेरी भरता. फेस्ताक लोक आपल्या चलयांक देण्यांक दिवपाक आलमार आनी हेर मदेराच्यो वस्तू घेतात. आदल्या काळांत फेस्ताच्या निमतान कुपें, किरभाट, ओडगीं ह्या वाड्यांनीं तियात्र जाताले. पूण आतां ती चाल जायत्या कारणाक लागून फाटीं पडल्या. तुमकां सगल्यांक माय दोस पोब्र सायबिणीच्या फेस्ताची परबीं!
फ्रिना एलोयसिया क्लेमेंत
9067151547
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
