मायलोमा आनी नवे उपचार

भांगरभूंय | प्रतिनिधी

फाटल्या 20 वर्सांत मायलोमाचेर उपचाराचे पर्याय खूब सुदारल्यात. पयलीं रसायन चिकित्सा आनी स्टिरॉयड हें प्रमाण आशिल्लें. आयज…

मायलोमा वा मल्टीपल मायलोमा हो रगताच्या कॅन्सराचो एक प्रकार आसून तो अस्थीमज्जांत आशिल्ल्या प्लाझ्मा पेशींनी (धव्या रगत पेशींतल्यान) सुरू जाता. प्लाझ्मा पेशी प्रतिपिंड तयार करून तुमकां संसर्गा पसून राखण दिवपाचें काम करतात आनी मायलोमांत असामान्य प्लाझ्मा पेशींची अनियंत्रीत वाड जावन भलायकेन बऱ्या पेशींची कुडींत गर्दी करता.  उपरांत हाडां, मूत्रपिंड आनी रोगप्रतिकार शक्त इबाडूंक शकता अशीं प्रथिनां तयार करतात.

लक्षांत घेवपा सारकीं लक्षणां

चड करून हाडांत दुखप (चड करून फाटीच्या वा बरगड्यांनी), थाकाय येवप, वारंवार संसर्ग जावप, वजन एकदम उणें जावप, मूत्रपिंडांचें काम उणें जावप हांचो आस्पाव जाता. निदान करपा खातीर सादारणपणान रगताची तपासणी, मुताची चांचणी, अस्थीमज्जा बायोप्सी आनी इमेजिंग चांचणी करची पडटा, जातूंत सीटी, एमआरआय वा पॅट स्कॅन आसूं येता.

उपचारांत कसो बदल जाला

फाटल्या 20 वर्सांत मायलोमाचेर उपचाराचे पर्याय खूब सुदारल्यात. पयलीं रसायन चिकित्सा आनी स्टिरॉयड हें प्रमाण आशिल्लें. आयज नव्या वखदां आनी उपचार पद्दतींनी ताचेर बरे नियंत्रण मेळयलां आनी चड काळ जियेवंक मेळटा.

नवे उपचार

प्रतिकारशक्ती संशोधक वखदां (देखीक- लेनालिडोमायड) मायलोमा आड झुजपाची रोगप्रतिकार शक्त वाडयतात.

प्रोटीअझोम प्रतिबंधक (देखीक- बोर्टेझोमिब) कॅन्सर पेशी कोयर काडपाक आडायतात, जाका लागून तांकां मरण येता.

मोनोक्लोनल प्रतिपिंड (देखीक- डारातुमुमॅब) हीं लॅबांत तयार केल्लीं प्रथिनां आसून तीं रोगप्रतिकार शक्त मायलोमा पेशींक लक्ष्य करून मारपाक मदत करतात.

सीएआर-टी पेशी उपचार हो एक प्रगत पर्याय आसून तातूंत दुयेंतीच्या स्वताच्या रोगप्रतिकार पेशींत बदल करून मायलोमा पेशी वळखतात आनी नश्ट करतात. सद्या ताचो उपेग रिलेप्स वा रेसिस्टंट दुयेंस आशिल्ल्यां खातीर जाता.

द्विविशिश्ट प्रतिपिंड हो वखदांचो एक नवो वर्ग आसून तो रोगप्रतिकार शक्तीच्या पेशींक कॅन्सर पेशीं कडेन जोडटा आनी ताका लागून तांकां चड प्रभावीपणान मारपाक मदत जाता.

अस्थीमज्जा प्रत्यारोपण करप

पात्र दुयेंती खातीर, खास करून तरणाट्यां खातीर, अस्थीमज्जा वा स्टॅम सेल प्रत्यारोपण उपचाराचो एक मुखेल भाग उरता. चड करून हातूंत दुयेंतीच्यो स्वताच्यो स्टॅम सेल्स एकठांय करून कॅन्सराचो नाश करपा खातीर चड प्रमाणांत रसायनीक उपचार दिवप, मागीर स्टेम सेल परतून हाडून अस्थीमज्जा परतून मेळोवप हांचो आस्पाव जाता. 

ह्या वेळार मायलोमाचेर वखद नासलें तरी उदयाक येवपी उपचार आनी नवनिर्माणांच्या भरपूर प्रमाणांतल्यान मायलोमाचेर उपचार केल्ल्या फाटल्या दशकां परस लोक चड काळ आनी बरे आयुश्य जियेवपाचे सकारात्मक परिणाम जातात. संशोधन चालूच आसा, मायलोमाचेर उपचार करपाक चड उमेद निर्माण जाता, उण्या तीव्र आनी प्रभावी उपचारां सयत.

तुमकां वा तुमच्या वळखीच्या कोणाकूय मायलोमाचें निदान जाल्यार, पिराय, भलायकी आनी दुयेंसाच्या पांवड्याचेर आदारीत सगळ्यांत बरे पर्याय समजून घेवपा खातीर तज्ञा कडेन उलोवचें.

(लेखक मणिपाल हॉस्पिटलांत क्लिनिकल हेमॅटोलॉजीचे सहाय्यक सल्लागार आसात.) 

– डॉ नकुल दिलीप तिकरे