भांगरभूंय | प्रतिनिधी
चड कळंतराचें हांयस दाखोवन लोकांची 130 कोटी रुपयांची फटवणूक
चौगां दुबावितांक जामीन मंजूर
पणजी: चड कळंतराचें हांयस दाखोवन लोकांची फटवणूक केल्ल्या मायरन रॉड्रिगीश हाच्या प्रकरणांत अर्थीक गुन्यांव फांट्यान (ईओसी) आयडीलीक गोवन गेटवेज कंपनीचे संचालक नोलन आंताव (फातोड्डें) ज्योकीम रोझारियो पिरीस (फातोड्डें), विजय जॉयल (कुडाळ, महाराष्ट्र) नवनीक परेरा (बाणावली) आनी सुशांत घोडगे (पेडणें) हांकां दुबावीत केल्यात. ईओसीन मायरन रॉड्रिगीश हो लंडनांत पळून गेल्ल्यान ताचे आड इंटरपोला वरवीं रेड कॉर्नर नोटीस जारी केल्या. तशेंच ह्या प्रकरणांत पिरीस सोडून हेरांक पणजेंतल्या उत्तर गोंय जिल्हो आनी सत्र न्यायालयान अंतरीम अटकपूर्व जामीन मंजूर केला. वयल्या प्रकरणाचे मुळावे चवकशेंत 130 कोटी रुपयांची फटावणूक केल्ल्याचें मुखार आयलां.
ह्या प्रकरणांत ईओसीचे प्रभारी अधिक्षक राहूल गुप्ता हांणी आयतारा पुलीस मुख्यालयांत घेतिल्ले पत्रकार परिशदेंत म्हायती दिली. ह्या वेळार तांचे सयत निरिक्षक राजाशद शेख आनी उपनिरिक्षक परेश रामनाथकार हाजीर आशिल्ले.
गुप्ता हांणी दिल्ले म्हायती प्रमाण दुबावीत मायरन रॉड्रिगीश आनी ताची घरकान्न दिपाली परब हांचे आड 2023 वर्सा दोन गुन्यांव दाखल केले. दोनूय गुन्यांवांनी दुबावितांनी राज्यांतल्या सुमार 50 गुंतवणुकदारांक सुमार 25 कोटी रुपयांची तोपी घाल्ल्याचें मुखार आयलां.
मजगतीं, ह्या प्रकरणांत ईओसीन चवकशी केली तेन्ना मायरन रॉड्रिगीश हाच्या बँक खात्यांत 2009 ते 17 ऑगस्ट 2023 मजगतीं 130 कोटी रुपयांचो अर्थीक वेव्हार जाल्ल्याचें मुखार आयलां. तशेंच मायरन हाणें आयडीलीक गोवन गेटवेज कंपनी वतीन बँक खात्यांत 3.25 कोटी रुपया जमा केल्ल्याचें मुखार आयलां. तशेंच वयले कंपनीचे 50 टक्के भागिदार आनी मायरन हाची 25 टक्के तशेंच दिपाली परब हिची 25 टक्के टक्केवारी आशिल्ली prospect realty ही कंपनी सुरू केली. ताका लागून ईओसीन वयल्या कंपनीचे संचालक नोलन आंताव, ज्योकीम रोझारियो पिरीस, विजय जॉयल, नवनीक परेरा आनी सुशांत घोडगे हांकां जोड दुबावीत म्हूण नोंद केले.
मजगतीं, वयले पैकीं ज्योकीम रोझारियो पिरीस सोडून हेरांक पणजेंतल्या उत्तर गोंय जिल्हो आनी सत्र न्यायालयांत अटकपूर्व जामीन अर्ज दाखल केला. त्या चार जाणांक न्यायालयान एक लाख रुपया आनी पांच दीस ईओसींत हाजेरी लावपाचे अटीचेर अंतरीम अटकपूर्व जामीन मंजूर केला. ह्या प्रकरणाची फुडली सुनावणी 29 नोव्हेंबराक दवरल्या.
मजगतीं, ईओसीन मायरन रॉड्रिगीश हो लंडनांत पळून गेल्ल्यान ताचे आड इंटरपोला वरवीं रेड कॉर्नर नोटीस जारी केल्या. ताची घरकान्न दिपाली परब हिची चवकशी सुरू केल्या. तशेंच ईओसीन दोगां दुबावितांच्या बँक खात्यांतले 6 लाख 8 हजार 663 रुपया जप्त केल्यात. जाल्यार तांचे 35 लाख 25 हजार रुपयांची कायम ठेव आनी दोन बँक लोकर गोठयल्यात. अदीक चवकशी केली तेन्ना ईओसीन तांचे 3.5 कोटी रुपयांचे सात फ्लॅट आनी एक व्हिला आनी हेर मालमत्ता जप्त करपाची प्रक्रिया सुरू केल्या.
दुबावीत मायरन रॉड्रिगीश, ताची आदली घरकान्न सुनिता रॉड्रिगीस, ताची सद्याची घरकान्न दिपाली परब ह्या तिगांनी गोंयांत तशेंच महाराष्ट्रांत खूबशा गुंतवणुकदारांची फटवणूक केल्ल्याच्या प्रकरणाची दखल घेवन मुंबय आनी गोंयांतल्या सक्तवसुली संचालनालयान (ईडी) गुन्यांव दाखल करून चवकशी सुरू केल्या.
भानगडीची व्याप्ती फातोड्डें तें लंडनः मुख्यमंत्री
गोंयांतलो सगल्यांत मोटो 130 कोटींचो घोटाळो उक्तडार आयला. अर्थीक गुन्यांव फांट्यान हे विशींचो तपास सुरू केला. फातोड्डें-मडगांव ते लंडन अशी ह्या घोटाळ्याची व्याप्ती आसा. सगल्यांचेर कारवाय जातली. आमदार विजय सरदेसाय हांणी आपल्या फार्महावसार पुलीस धाडिल्लें अशें म्हणलां. ते विशीं विचारलें तेन्ना आपल्याक हाची कल्पना ना. हो इतलो व्हड घोटाळो आसा आनी ताचो तपास अर्थीक गुन्यांव फाट्यां कडल्यान करतात अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
