भांगरभूंय | प्रतिनिधी
शिक्षणाची भास खंयची आसची हाचेर आमचे कडेन फाटलीं कितलिंशींच वर्सां विचारमंथन सुरू आसा. फक्त समाजांतूच
न्हय जाल्यार घराघरांनी हाचेर चर्चा सुरू आसा. चर्चा कसली वाद विवादूच तो. कारण आवय-बापूय, सोयरे, शेजारी ह्या सगल्यां मदीं मतभिन्नताय दिसून येता. शिक्षणा खातीर खंयचें माध्यम स्विकारचें हे विशीं तर्कशास्त्र वापरिनात आनी ताका लागून मध्यमवर्गीय आनी ताचे सकयल्यांचो गोंदळ जाता. चड करून इंग्लीश माध्यमांच्यो शाळा जश्यो वाडूंक लागल्यो तसो हो गोंदळ चड जावंक लागलो. इंग्लीश माध्यमांच्या शाळांच्या झगमगाटाक भुलून सर्वसामान्य मनीस लेगीत आपल्या भुरग्याक इंग्लीश माध्यमांचे शाळेंत दाखल करूंक लागलो.
पयलीं शारां पुरतेंच मर्यादीत आशिल्लें हें लोण आतां गांवगिऱ्या वाठारांनीय पातळ्ळां. गांवांतले तशेंच शार वाठारांतले गरीब, कश्टकरी पालक रीण काडून, उश्णें घेवन लाखांनी रुपयांच्यो देणग्यो भरून आपल्या भुरग्यांक इंग्लीश माध्यमांचे शाळेंत दाखल करतात. मुळांत इंग्लीश शिकप आनी इंग्लीश माध्यम शिक्षण म्हणून वेंचप हातूंत पालक चुको करतात. इंग्लीश शिकपा खातीर इंग्लीश माध्यम वेंचप खरेंच गरजेचें आसा व्हय? इंग्लीश शिकपा खातीर संपूर्ण शिक्षणूच इंग्लीशींतल्यान घेवप योग्य आसा व्हय? हाचो विचार पालक करिनात. मायभाशेंतल्यान शिक्षण घेवन लेगीत बरें इंग्लीश शिकूं येता, हेंच पालक विसरत चल्ल्यात. मायभाशेंतल्यान शिक्षण हीच शिकपाची सैमीक पद्दत आसा. मायभास ही खऱ्या अर्थान ज्ञानभास आसा. ती भास भुरग्याक आवयच्या पोटांत आसत सावन आयकूंक मेळटा. मायभाशेंतल्यान शिक्षण घेतिल्ल्यान भुरग्याची मानसीक वाड परिपूर्ण जाता, कारण तें भुरगें ज्या वातावरणाचो भाग आसा त्या वातवरणाचे प्रतिबींब ताका मायभाशेंतल्यान दिसता. ताकालागून मायभाशेंतल्यान शिक्षण हीच शिकपाची आदर्श पद्दत आसा.
सांस्कृतीक, समाजीक मुल्यांची रुजवण फक्त मायभाशेंतल्यानूच जावंक शकता. दरेक व्यक्तीचे जिणेंत माय, माती, मायभास आनी मायभूंय हांकां खूब म्हत्व आसता. मांय जल्म दिता, माती भरण पोशण करता, मायभूंय आलाशिरो सुरक्षा दिता आनी मायभास योग्य संस्कार करता. ह्या संस्काराच्या शिदोरीचेरूच दरेक मनशाचें जिवन सुखी आनी समृद्ध जाता. म्हणून किमान मुळाव्या आनी माध्यमीक पांवड्यार तरी शिक्षणाचें माध्यम हें मायभास आसूंक जाय अशें खूबशे भाशातज्ञ, समाजशास्त्रज्ञ, मानशास्त्रज्ञ तशेंच समाजीक, शिक्षणीक मळार काम करपी राष्ट्रीय आनी संवसारीक पांवड्या वेल्यो संस्था आड्डून सांगत आसात. सुरवातीक एकदां मायभाशेंतल्यान मुलभूत शिक्षण घेतले उपरांत इंग्लीश वा हेर विदेशी भास गरजे प्रमाण आत्सात करप, तांचो काळ परिस्थिती प्रमाण वापर करप हाका कोणाची कसलीच हरकत आसपाचें कारण ना. शिक्षण प्रणालींतल्यान अशें शिक्षण दिवंक जाय की शिक्षण घेवन भायर सरता ताका तो रावत आशिल्ल्या प्रदेशांतल्या पर्यावरणाची जाण आसतली, राष्ट्रनिश्ठा, राष्ट्रप्रेम आनी राष्ट्रीय जबाबदारीचे ताका भान आसतलें. देशाक भेडसावपी समस्या आनी आव्हानां वळखून ताका सामकार वचपा खातीर तो समर्थ आसतलो. युनेस्को ही युनोची शिक्षणीक मळार काम करपी उपसंस्था आसा. युनेस्कोन केल्ल्या संशोधनांतल्यान मायभाशेंतल्यान शिक्षण घेतिल्ल्या विद्यार्थ्यां आकलनशक्त आनी गुणवत्ता ही मायभाशेंतल्या माध्यमांतल्यान शिक्षण घेतिल्ल्या विद्यार्थ्यां परस कितली तरी बरी आनी सरळ आसता अशें दिसून आयलां.
महात्मा गांधी म्हणटात मायभास शिक्षणाचें योग्य माध्यम आसा. मायभाशेंतल्यानूच भुरग्यांचो भावनीक आनी समाजीक विकास जावंक शकता. सांस्कृतीक आनी समाजीक मुल्यांची पेरणी फक्त मायभाशेंतल्यानूच जावंक शकता. ज्येश्ठ शास्त्रज्ञ डॉ. अनील काकोडकार म्हणटात, मायभासूच भुरग्यांच्या सभावीक शिक्षणाचें माध्यम आसून तेच भाशेंतल्यान तांचो सर्वांगी विकास जावंक शकता. इंग्लीश माध्यमाचो विचार करीत जाल्यार इंग्लीश ही आंतरराष्ट्रीय भास आसा. इंग्लीशीचेर प्रभुत्व मेळयिल्ल्या भुरग्यांक सगल्याच मळार संद उपलब्ध जातली अशें पालकांक दिसता म्हणून पालक इंग्लीश माध्यमांचे शाळेंत भुरग्यांक घालतात आसत अशें जरी मान्य केलें तरी इंग्लीश माध्यमांच्या शाळेंतल्यान शिकिल्लीं सगलींच भुरगीं येसस्वी जातात अशेंय ना. उरफाटें आयज जे उंचेल्या पदार पाविल्ले मानेस्त आसात, मागीर ते डॉक्टर, इंजिनीयर, वकील, शिक्षक, प्राध्यापक, साहित्यीक आसूं वा शास्त्रज्ञ, उद्देजक, फुडारी, अभिनेतो सगलेच मायभाशेंतल्यान शिकिल्ले आसात. आयएएस, आयपीएस, आयएफएस हांची जरी वळेरी पळयत जाल्यार तातूंतले 95 टक्के अधिकाऱ्यांचें शिक्षण मायभाशेंतल्यानूच जालां.
फाटल्या कांय वर्सांत सर्तींचे परिक्षेंत येसस्वी जाल्ल्या विद्यार्थ्यां मदीं सगल्यांत चड संख्या मायभाशेंतल्यान शिक्षण घेवपी विद्यार्थ्यांचीच आसा. इंग्लंड, अमेरिका, फ्रांस, जर्मनी, चीन, जपान, रशिया ह्या सारक्या प्रगत देशांनीय मायभाशेंतल्यानूच शिक्षण दितात. ह्या देशांतले पालक हेतुपुरस्सर आपल्या भुरग्यांक मायभाशेंतल्यान शिक्षण दितात. फिनलॅण्ड सारको देश की ज्या देशाचे शिक्षण पद्दतीचे अनुकरण प्रगत राष्ट्रां लेगीत करतात. त्या देशांतूय मायभाशेंतल्यान शिक्षण दितात. गोंयचे विशीं उलोवपाचें आसत जाल्यार भुरग्यांक इंग्लीशीचे डोस पाजत जाल्यार हांगासरले कोंकणी भाशेचो समृद्ध ठेवो लुप्त जातलो. भुरग्यां मदीं राष्ट्राभिमान, राष्ट्रीय एकात्मता, बऱ्या संस्काराचे रोपण करपाक मायभासूच कामाक येतली. शिक्षणांत मायभाशेक लागून व्यक्तीमत्वाचो सर्वांगी विकास शक्य आसा. मायभास ही संस्काराचो आनी संस्कृतीचो मानबिंदू आसा. जितले सहजतायेन भुरगें मायभाशेंतल्यान शिकता तितले सहजतायेन इंग्लीश शिकना. म्हणून मायभाशेंतल्यान शिक्षण हेंच खरें शिक्षण आसा.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
