भांगरभूंय | प्रतिनिधी
विजय भिकेः सुवार्था खातीर भाजपांत गेल्ल्याचो आरोप
भांगरभूंय । प्रतिनिधी
म्हापशें: कळंगूटचे आमदार मायकल लोबो स्वता आपुणूच मुख्यमंत्री आशिल्ले भशेन वागता. शिश्टाचारा प्रमाण मुख्यमंत्री वा पर्यटन मंत्र्यान पर्यटकांच्या ई- व्हिसा संबंदांत प्रधानमंत्री नरेंद्र मोदी आनी केंद्री मंत्र्यांक पत्र बरोवपाची गरज आशिल्ली. पूण लोबो स्वताचे प्रसिद्धी खातीर स्टंटबाजी करता, असो आरोप काँग्रेस फुडारी विजय भिके हांणी केलो.
बुधवारा म्हापशेंच्या पक्ष कार्यालयांत आयोजीत पत्रकार परिशदेंत भिके उलयताले. ह्या वेळार तांचे वांगडा एल्वीस गोम्स, उत्तर गोंय जिल्हो अध्यक्ष विरेंद्र शिरोडकार आनी सरचिटणीस फिरोज खान हाजीर आशिल्ले.
विदेशी पर्यटकांच्या ई- व्हिसा प्रस्ना संबंदांत मुख्यमंत्री वा पर्यटन मंत्र्यान प्रधानमंत्र्यांक निवेदन दिवपाक जाय आशिल्लें. पूण लोबो हांणी पत्र बरयलां. हो सगळो प्रकार हांसपा सारको, अशी टिका भिके हांणी केली.
मायकल लोबो हे सुवार्थी राजकारणी. स्वताचो वेवसाय वाटोवपा खातीर ते भाजपाच्या गोपांत रिगला. विधानसभा वेंचणुकेंत भाजपाचे उमेदवारीचेर जिखचों ना हाची खात्री जाल्ल्यान ते काँग्रेसींत आयले. काँग्रेसीन ताका विरोधी पक्ष फुडारी केलो, पूण तांणी काँग्रेसीचो विस्वासघात केलो, असो लेगीत आरोप भिके हांणी केलो. काँग्रेस पक्षाचे फुडारी राहुल गांधी हांचे विशीं उलोवचे आदीं लोबो हांणी आदीं विचार करचो. काँग्रेसीची उमेदवारी मेळची म्हूण ह्याच राहुल गांधी कडेन लोबो गेल्लो. काँग्रेसीन तांचे खातीर खूब कितें केलां. लोबो हांणी काँग्रेसीचे उपकार मानपाक जाय, अशें भिके हांणी सांगलें.
भारत जोडो यात्रेक सगळ्यांचोच तेंकोः एल्वीस
काँग्रेसीचे भारत जोडो यात्रेचो उद्देश अजून लेगीत कांय लोकांक समजूंक ना. सध्या देशांतल्या जात- धर्मांच्या नांवाचेर जावपी विभाजनाचेर हे यात्रे वरवीं आवाज काडटात. लोक स्वता जावन हे यात्रेंत वांटेकार जातात. काँग्रेस समर्थकांचोच न्हय जाल्यार सगळ्या घटकांतल्या लोकांचो हे यात्रेक तेंको मेळटा, असो दावो एल्वीस गोम्स हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
