मायकलबाबाक वालोर, पूण…

भांगरभूंय | प्रतिनिधी

वारें येता तशें सूप धरल्यार तांचें काम जावन पडटा. आनीक कितें जाय? मागीर देवाचें रुपडें कोणूय घालून भोंवूं!!! तांकां फरक पडना. जाका फरक पडटा तो उलयता, बरयता आनी आवाज काडटा.

राजकारणी वतरेवपाक लागले म्हुणटकच समजुपाचें की ते असंतुश्ट आसात. तें मागीर सत्ता मेळना म्हूण आसत, सत्तेचो फायदो मेळना म्हूण आसत वा आपल्याक जाय तशें जायना म्हूण आसत. आपली चूक, अर्थीक भानगडी, लफडीं, भ्रश्टाचार, लोकांचेर केल्लो अन्याय, हे सगळे प्रकार समाजा मुखार उक्ते जातकच हेच राजकारणी ‘समाज कार्ड’ काडून आपल्याक कवच मेळयतात. तांच्या ग्लिसरीनाच्या दुकांक त्या- त्या समाजाचे लोक बळीय पडटात. ‘आसूं रे आमचोच तो’ अशें म्हणून उजो पालयतात. मालमत्तेक लागिल्लो उजो पालोवंकूच जाय, पूण अहंकाराचो उजो पालयल्यार ‘तो’ नश्ट जावचो ना. अहंकार, अन्याय, भ्रश्टाचार, अर्थीक भानगडी नश्ट जावन समाजाक एक बरें वातावरण मेळपाची गरज आसा.
कळंगुटचे आमदार मायकलबाब लोबो खूब फावट समाजाचेर जावपी अन्यायाचेर आवाज काडटना दिसतात. म्हणल्यार तांच्या दर्यादेग वाठारांतलें वातावरण बरें उरचें अशें तांकां दिसता आनी ते खातीर ते आवाज काडटात. लोकां वांगडा आंदोलनांनी उबे रावतात आनी सरकारांत आसुनय बेधडक उलयतात. हाचो अर्थ खूब तरेन काडूं येता. सरकार तांचें आयकना काय? सरकारांत आसूनय ते नग कशे जाल्यात काय? काय ते असंतुश्ट आसात? हाची जाप मायकलबाबच दिवंक शकतात. घडये 2027 ची विधानसभा वेंचणूक लागीं पावता पावता ते हे विशीं मनमोकळे उलयतूय. फकत हें उलयतना तांणी देवाचो सोपूत मात घेवचो न्हय. कित्याक तर देवाक मानप्यांचें मन दुखवतलें. तांणी तें दुखपाक दिवचें न्हय.
देवाक दिल्लो सोपूत मोडून 14 सप्टेंबर 2022 त काँग्रेसींतल्यान भाजपांत आयिल्ले मायकलबाब लोबो उत्तरेंतले एक बळिश्ट राजकारणी. तांची घरकान्न डिलायला लोबो ही शिवोलीची आमदार तर पूत डॅनियल पर्राचो सरपंच. आनीक कितें जाय? अख्ख्या घराण्याकूच देवान लोकांचें ‘कल्याण’ करपाची संद दिल्या.
जो राजकारणी हेर मतदारसंघांतल्या उमेदवारांक स्वबळाचेर जिखोवन हाडूंक शकता, तो फुडाराक आपल्या पुताकूय खंयच्याय मतदारसंघांतल्यान जिखोवन हाडपाक शकता. लोककल्याणा खातीर!!! पूण अशें आसूनय मायकलबाब लोबो हांकां भाजपाच्या मंत्रिमंडळांत परत सुवात मेळूंक ना ही लोकां खातीर खूब अजापाची गजाल आसा. फाटल्या कार्यकाळांत ते भाजपांत मंत्री आशिल्ले आनी वेंचणुकेच्या कांय दिसां आदीं काँग्रेसींत भितर सरून, काँग्रेसीचे तिकेटीचेर आपल्याक आनी आपले घरकान्नीक जिखोवन हाडून वेंचणुके उपरांत रोखडोच परत भाजपांत गेलो. अशी खेळी अशे बळिश्ट राजकारणीच खेळपाक शकतात हें आतां मेरेन सिद्ध जालां. कार्यकर्ते संतुश्ट उरतकच 100 फावट देवाक फटयले जाल्यार लेगीत तांकां तें वायट दिसना वा तांच्यो भावना दुखनात, हेंवूंय हालीं तेंपार दिसून आयलां. वारें येता तशें सूप धरल्यार तांचें काम जावन पडटा. आनीक कितें जाय? मागीर देवाचें रुपडें कोणूय घालून भोंवूं!!! तांकां फरक पडना. जाका फरक पडटा तो उलयता, बरयता आनी आवाज काडटा.
पोरूं जून म्हयन्यांत मायकल लोबो हांणी येरादारी पुलिसांचेर फोग काडून तांकां ‘टार्गेट’ दिलां आसुंये असो आरोप केल्लो. हे येरादारी पुलीस खंयूय रावून पर्यटकांक तालांव दितात आनी तांकां त्रास करतात अशें तांणी म्हणिल्लें. रस्त्याची सुरक्षा पळोवपाची सोडून तांचें लक्ष भलतेच कडेन आसता असो तांचो सूर आशिल्लो. पूण एका वर्सा उपरांत आयज ही परिस्थिती बदल्ल्या? रस्त्यांचेर अपघात जावपाचे बंद जाल्यात? येरादारी पुलीस पर्यटकांक तालांव दिनात? (येरादारी नेम मोडप्यांचेर कारवाय जावंकच जाय, तो मागीर कोणूय आसना). हें सरकार मायकलबाबाचें आयकना?
मायकलबाब पोरसूंव किल्लयता. शेती संस्कृती मुखार व्हरता आनी मुखेल म्हुणल्यार किल्लयलें एकलोच खायना. दुसऱ्यांकय दिता. दानत आसा. हालींच तांची घरकान्न, मुख्यमंत्र्याक काळींग भेटयतना दिसली. घडये विरोधकांकय हीं काळगां पावल्यांत. तो सगळ्यां कडेन बरें नातें दवरून आसा…
भाजपांत भितर सरचे दोन म्हयन्यां आदीं मायकल लोबो हांचेर जमीन भरून काडप आनी झाडां मारपाच्या कथीत आरोपां वयल्यान पुलीस कागाळ जाल्ली. शार आनी नगर नियोजन मंत्री विश्वजीत राणे हांणी हें प्रकरण बरेंच मनार घेतिल्लें आनी कारवाय जातलीच अशें उतर जनतेक दिल्लें. तें उतर मायकलबाब भाजपांत भितर सरतकच वाऱ्या वांगडा हुबून गेलें आनी सूप येवन सत्तेच्या दारांत उबें रावलें. हालींच भाजपाची बसका जावन सगळे फुडारी भायर सरले तेन्ना विश्वजीत राणे आनी मायकल लोबो एकामेकां कडेन बरे हांसून उलयतना दिसले.
काल- पयर मायकलबाबान परत एक फावट आवाज काडला आनी सरकाराक सुचोवण्यो केल्यात. भिकाऱ्यांचें पुनर्वसन करचें. गुटखो मातये भरवण करचो आनी पर्यटनाक चालना दिवची अशें तांणी म्हणलां. पर्यटकांचो आंकडो देंवता असो हुस्को तांणी परत उक्तायला. गुटखो बंद केलोना जाल्यार खंय गोंयच्या दर्यादेगां वयलीं भांगराळी रेंव गुटख्याचे थुकयेन तांबडी जातली. ते खातीर तांणी कारवाय जावपाची मागणी केल्या. मायकलबाब सत्तेंत आसुनय तांची मागणी जर पूर्ण जायना, जाल्यार सामान्य मनशान कसलीय मागणी करपाचें धाडस करूं येता?
मायकलबाबान अशें धाडस करीत रावचें, पूण फाल्यां-परवां मंत्रिमंडळांत सुवात मेळ्ळी जाल्यारूय जनतेचेर जावपी अन्याया आड आवाज काडचो…. जमतलें?

संजय बोरकार
9921343430