भांगरभूंय | प्रतिनिधी
पणजीः पाली-सत्तरी वाठारांत भोंवपी वांस्वेलाचो (वांस्वेल) व्हिडियो व्हायरल जाले उपरांत तीन म्हयन्यां आदीं गोंयचे शिमेर आशिल्ल्या मान गांवांतल्या एका शेतकाराचेर वांस्वेलान हल्लो केल्ल्याचें मुखार आयलें. हल्ल्यांत ताचो डावो पांय गेलो.
फाटल्या वर्सा डिसेंबरांत कर्नाटकाच्या खानापूर तालुक्यांतल्या मान गांवांतलो सखाराम गावकार दनपारां 12 वरांचेर घरकान्नी वांगडा शेतांत गेल्लो. अचकीत मुखार दोन वांस्वेलां आयली. गावकार हांणी आपरक्षणा खातीर हातान फातर उखल्लो. तेन्ना एक वांस्वेल दोन पांयांचेर उबे रावले. हांवें घरकान्नीक लागसारच्या झाडार चडपाची सुचोवणी केली. ती झाडार चडली आनी हांवूय झाडार चडपाचो यत्न करतालो. पूण तेन्नाच वांस्वेलाची नदर म्हजेर पडली आनी तांणे म्हजे वटेन उडी मारली. झाडार चडपाचो यत्न करताना वांस्वेलान म्हजो डावो पांय धरलो आनी म्हाका चाबपाक लागले. मात हांव झाडाक घट्ट धरुन रावलो. कारण हांव सकयल पडिल्लो जाल्यार वांस्वेलान म्हाका पुराय खाल्ले आसता आसले. सुमार एक वर दोनूय वांस्वेलां म्हज्या पांयाचो चाबो घेताली. तांणी धोपरा मेरेन पांयांक चाबो काडलो. मागीर संद पळोवन कमरेतलो कोयतो काडलो आनी वांस्वेलाचे तकलेर मारलो. तेन्ना वांस्वेल कुशीक सरले अशें गांवकार हांणी सांगलें.
गावकारान सांगलें, वांस्वेल पयस गेला हें कळटकच चाबिल्लो पांय उखलून वयर घेतलो आनी आंगावयलो कपडो फाडून पांयाक बांदलो. उदक पियेल्या उपरांत मात्शें बरें दिसूंक लागलें. मागीर घरकान्नीन म्हाका फाटीर घेतले आनी एक किलोमीटर अंतराचेर व्हेले. जांबोटी सावन अॅम्ब्युलन्स येवपाक 3 वरां लागली. सुमार दोन वरां तसोच त्याच स्थितींत हांव थंय तणाचेर पडून आशिल्लो. उपरांत हॉस्पिटलांत वचून उपचर सुरु जाले. पांयाचेर शस्त्रक्रिया केल्या उपरांत धोपरा पसून पांय कापलो.
मान गांवांत आतां मेरेन वांस्वेलांनी मनशांचेर हल्लो करपाच्यो चार घडणुको घडल्यात. फाटल्या वर्सा दोडामार्ग तालुक्यांतल्या लागसारच्या मांगेली गांवांत एका तरणाट्याचेर वांस्वेलान हल्लो केल्लो. ह्या घडणुकांक लागून थळाव्या लोकां मदीं भंयाचे वातावरण निर्माण जाला.
वांस्वेलांक फणस, वाळटी आवडटात: केरकार
हे फाटभुंयेर पर्यावरणशास्त्रज्ञ राजेंद्र केरकार हांणी, वांस्वेलांक फणस आनी वाळटी आवडटात म्हणून ती मनशाच्या वसणुकांनी येतात अशें निरीक्षण नोंद केले. फणसाच्या वासाक लागून वांस्वेलां आकर्शीत जातात. तशेंच तांकां वाळवी आवडटात. आंबो, जांभळा, भेडशी सारकिल्ल्या फळांचो वास घेवन ती बागायतींच्या वाठारांत येतात. देखून त्या वाठारांतल्या लोकांनी सकाळीं 10 वरां पयलीं आनी सांजवेळा 4 उपरांत रान वाठारांत वचूंक टाळचे असो सल्लो रान खात्यान दिवपाची गरज आसा अशें केरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
