भांगरभूंय | प्रतिनिधी
पणजी : फावोश्या वातावरणाक लागून मान्सून केरळांत 27 जून मेरेन पावपाचो अदमास हवामान खात्यान उक्तायला. मान्सूनाक केरळांतल्यान गोंयांत पावपाक सादारण 4 ते 5 दीस लागतात. हाका लागूनमान्सून केरळांत पावपाचो अदमास खरे थारलो जाल्यार तो गोंयांत 1 ते 2 जून मेरेन पावपाक शकता. पोरूं गोंयांत 4 जूनाक मान्सून पाविल्लो. एकेकदां फावोशें वातावरण नासल्यार मान्सूनाक केरळांतल्यान गोंयांत पावपाक कळाव लेगीत जावपाक शकता.
शेनवारा गोंयांतलो पारो वाडिल्लोच आशिल्लो. पणजे चडांत चड 35.2 अंश जाल्यार उण्यांत उणें 26.7 अंश सेल्सियस तापमानाची नोंद जाली. मुरगांवचें चडांत चड तापमान 34.8 अंश आनी उण्यांत उणें तापमान 27 अंश सेल्सियस आसलें. आयतारा 11 मेक गोंयांत किरकोळ पावसाची शक्यताय आसा. फुडले स दीस गोंयांतलें चडांत चड तापमान 35 जाल्यार उण्यांत उणें 27 अंश सेल्सियस मेरेन आसपाची शक्यताय आसा. ह्या काळांत चडांत चड तापमानांत व्हडलो बदल जावपाची शक्यताय ना, अशें खात्यान स्पश्ट केलां.
गोंयांत 1 मार्च ते 10 मे मेरेन सरासरी 13.6 मिलीमिटर पावसाची नोंद जाल्या. अंदूंचो मान्सूनपूर्व पावस 16.5 टक्क्यांनी उणो आसा. ह्या काळांत धारबांदोड्यां सगल्यांत चड 32.7 मिमि पावसाची नोंद जाल्या. ताचे उपरांत सांखळे 28.2 मिमि, सांग्यार 24.6 मिमि, फोंड्यां 23.6 मिमि जाल्यार वाळपय 22.4 मिमि पावसाची नोंद जाल्या.
गोंयांत 12 ते 14 मे मेरेन वाऱ्याची वेग वराक 45 ते 55 किलोमिटर मेरेन पावपाची शक्यताय आसा. हे खातीर नुस्तेमारांनी दर्यांत वच्चें न्हय, अशें खात्यान कळयलां. हवामान खात्या वतीन मान्सून केरळांत केन्ना पावतलो हाचो अदमास काडपाक स विवीध मॉडेलांचो शास्त्रीय पद्दतीन अभ्यास करतात. खात्या वतीन 2005 सावन असो अदमास काडटात. 2015 सोडल्यार खात्याचे हेर सगळे अदमास खरे थारल्यात. हाचे आदीं 2009 त मान्सून केरळांत 23 मेक पाविल्लो. अंदूंचो अदमास खरो थारलो जल्यार 16 वर्सांत मान्सून केरळांत दुसरे खेपे बेगीन पावतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
