भांगरभूंय | प्रतिनिधी
मुंबय, खबरां संस्था: सध्याचे गरमेंतल्यान कांय दिसांनी लोकांक सुशेग मेळपाचो आसा. हाचें कारण म्हणल्यार कांय दिसांनी गोंयां सयत गोंयच्या आशिकुशीकच्या राज्यांनी मान्सून सुरू जावपाचो आसा. अंदमानांत दाखल जाल्ल्या वार्यावेल्यान हो अदमास घेतला.
मजगतीं, हवामान खात्यान येलो अलर्ट दीत गोंयांत आयच्यान फुडले चार दीस पावसाची शक्यताय उक्तायल्या. तशेंच काल गोंयच्या कांय वाठारांनी पावस झडलो. वारो आनी पावसाक लागून सत्तरींत बरेच लुकसाण जाल्ल्याचीय म्हायती मेळ्ळ्या.
हवामान विभागाच्या म्हायती प्रमाण मालदीव आनी श्रीलंके मेरेन मान्सून पावला. थंय अंदमान आनी बंगालच्या उपसागरांत ताणें बरोच नेट धरला. जाका लागून २७ मे मेरेन मान्सून केरळांत पावपाचो अदमास आसा. अंदूं अपेक्षीत १३ मे आदींच मान्सूनचें वारें अंदमान आनी निकोबार जुंव्याचेर दाखल जालां. थंयच्यान हो वारो बंगालच्या उपसागरा पसून अरबी दर्या आनी श्रीलंकेच्या कोमोरिनचो वाठार मेरेन पावलो.
मान्सूनच्या प्रवासांत वेग…
केंद्रीय हवामानशास्त्र विभागाचे म्हायती प्रमाण फुडल्या चार सप्तकांत मोसमी वारें म्हळ्यार पावसाचो प्रवास समाधानी वेगान जातलो. येवपी चार सप्तकांत देशांत नैऋत्य मोसमी वार्याची गती वाडप अपेक्षीत आसा. जाका लागून वेळा पयलींच मोसमी पावस केरळांत दाखल जाल्यार अजापीत जवपाचें कारण ना.
मान्सून सुरू जावपाचें चित्र पळयल्यार जून म्हयन्याच्या पयल्या सप्तकांत तो केरळांत पावता. फुडें कोकण, महाराष्ट्र, गोंय करीत देशाच्या हेर वाठारांनीय पावता. अंदूं केरळांत मान्सून वेळा पयलीं आयलो, म्हणल्यार तो गोंय आनी महाराष्ट्रांतूय वेळा पयलींच येवपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
