भांगरभूंय | प्रतिनिधी
पणजी : राज्यांत 123.18 इंच पावसा सयत मान्सून हंगामाची सांगता जाली. अंदूं सरासरी परस 4.2 टक्के चड पावसाची नोंद जाल्या. 1 जून ते 30 सप्टेंबर मजगतीं धारबांदोड्यां सदल्यांत चड 161.94 इंच पावसाची नोंद जाली. हवामान खात्या वतीन 1 जून ते 30 सप्टेंबर मजगतींच्या पावसाक हंगामी पावस अशें म्हणटात. फाटल्या वर्सा मान्सून हंगामांत विक्रमी 173.25 इंच पावसाची नोंद जाल्ली.
हवामान खात्या वतीन 1 जून ते 30 सप्टेंबर हो हंगामी पावस समजता. जाल्यार 1 जानेवारी ते 31 डिसेंबर मजगतींच्या पावसाक वर्सुकी पावस म्हणटात.
राज्यांत पावसाची वर्सुकी सरासरी 129.92 इंच जाल्यार जून ते सप्टेंबर मजगतीं हंगामी सरासरी 118.42 इंच आसा. अंदूं पावसान हंगामी सरासरी 24 सप्टेंबराक पुराय केल्ली. ह्यान पयलीं हवामान खात्यान जारी केल्ल्या लांब पल्ल्याच्या अहवालांत गोंयांत सरासरी परस जास्त पावस पडपाची शक्यताय उक्तायल्ली.
हवामान खात्यान 4 ऑक्टोबराक मध्यम स्वरूपाच्या पावसाची शक्यताय उक्तायत येलो अलर्ट जारी केला. जाल्यार 1 ते 3 ऑक्टोबर मजगतीं पावस शिरशिरपाची शक्यताय उक्तायल्या. हाचे मजगतीं कसलेच तरेचो अलर्ट जारी करूंक ना. 1 जून ते 30 सप्टेंबर मजगतीं सांगेंच्या 161.25 इंच, वाळपय 159.14 इंच, केप्यां 151.43 इंच, जाल्यार सांखळे 127.22 इंच पावसाची नोंद जाली
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
