भांगरभूंय | प्रतिनिधी
पर्यटन खात्याची म्हायती
भांगरभूंय । प्रतिनिधी
पणजीः गोंयात मान्सून पर्यटनांक चालना दिवपा खातीर पर्यटन खात्यान एअरलायन्स कंपनी आनी ऑनलायन ट्रेव्हल एजंटाक आस्पावन घेवन गोंयात सर्वसमावेक्षक मान्सून उपक्रमाची म्हायती पर्यटका मेरेन पावोवपा खातीर फुडाकार घेतलां. अंदूंच्या पावसाळ्यांत गोंयचें गावगिरें वाठार आनी राज्यांतले कोणांक खबर नाशिल्ले घशघशे पर्यटका मुखार हाडपाची मोख पर्यटन खात्यान दवरल्या.
पहलगाम हल्ल्या उपरांत पर्यटकांचो आंकडो मे म्हयन्यात उणो जाल्ले कारणान तो भरून काडपा खातीर पर्यटन खात्यान मान्सून पर्यटनाचेर भर दिवपाचे थारयला.
हे विशीं अदीक म्हायती दितना पर्यटन खात्याच्या अधिकाऱ्यांन सांगलें, पर्यटन खात्यान विविध राष्ट्रीय तशेंच आंतरराष्ट्रीय इव्हेंटांत वांटेकार जावन मान्सून पर्यटनाची प्रसिध्दी करून खास करून पावसात गोंयात भेट दिवपा खातीर पर्यटकांक प्रोत्साहन दिला. जुलय म्हयन्यात खासा लक्ष खाद्य पर्यटनाचेर दिला आनी ह्या उपक्रमा खाला राज्यांतल्या वेगवेगळ्या वाठारांतली गिरेस्त खाद्य संस्कृती पर्यटकां मुखार मांडटलें.
दर्या पलतडी गोंय हे मोहीमे वरवीं पावसाळी सांस्कृतिक उत्सव जशें की सांजाव, चिखल कालो आनी हेर थळाव्या उत्सवांचेर भर दिलां. हे उपक्रम पर्यटकां मेरेन पावोपा खातीर पर्यटन खात्यान पयलेचे खेपे एअरलायन्स, ऑनलायन ट्रेव्हल एजंट आनी आदारातीथ्य संस्थाकडे भागीदारी करून स्पर्धात्मक पॅकेज आनी निवडक पावसाळी अणभव तयार करपाक सांगलां. तशेंच तांचे रावपाचो काळ वाडोवन चड पयशे मोडपी पर्यटकांक आर्कशीत करपाक सांगलां, अशी म्हायती अधिकाऱ्यान दिली.
गोंयच्या गावगिऱ्या वाठारांतले पांचवेसार दोंगर, भितर लिपून आशिल्ले घसघशे आनी गावगिरी जीण ह्या गजालींचेर पावसाळी पर्यटना खाला महत्व दिला. गोंयची जैवविवधताय आनी सैमिक सोबीतकाय अणभवपा खातीर इको ट्युरीजम हॉटस्पॉट तयार करतले. पारंपारीक पावसाळी खाण दाखोवपा खातीर पुराय राज्यांतले शार आनी ग्रामीण भागात खाद्य केंद्रा उबारतले. दायज आनी संस्कृती मनोवपी उत्सव जशें की सांजाव आनी चिखल कालो हे मान्सून पर्यटनाचे केंद्रस्थानी आसतलें, अशें अधिकाऱ्यान सांगलें.
मान्सून हंगाम हो ऑफ-सिजन न्हय तर सक्रीय पर्यटन हंगाम म्हूण रिब्रेंड केला. सांस्कृतिक आनी सैमिक अणभवाची निवड करून हो हंगाम एकटे प्रवास करपी, बायला प्रवासी, विद्यार्थी गट आनी कुटुंबाक पुरक असो थारयालां. मान्सून पर्यटन पर्यटकांचे एका थळावेल्यान सगळी कडेन तांचो विस्तार करता, कमी भेट दिवपी वाठारांत आर्थिक लाव पावयता आनी पुराय वर्स भर पर्यटनाची शाश्वती दिता, अशें अधिकाऱ्यान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
