भांगरभूंय | प्रतिनिधी
वाळपय: मान्सूनपूर्व पावस पिकांच्या मुळार वार करपी थारला. अपेक्षे पयलींच पावस झडिल्ल्यान भिण्णांचीं सोलां आनी मिरसांगेचे लागवडीचेर परिणाम जाल्ल्याचें पळोवपाक मेळटा. हाका लागून अंदूंच्या मौसमांत मिरसांगेचें उत्पादन उणें जावपाची शक्यताय आसा. जाल्यार भिण्णाचीं सोलां तयार करपी उत्पादकांक हाचो अर्थीक पांवड्यार फटको बसला.
गोंयच्या बाजारांत व्हडा प्रमाणांत भिण्णांचीं सोलां येतात. गोंयकारांच्या जेवणांत भिण्णांचीं सोलां वापरतात. तशेंच भिण्णांच्या सोलां पसून जायते पदार्थ करतात. मे म्हयन्याचे पंदरा तारखे मेरेन भिण्णां तयार जातात. तीं काडून, ताचेर प्रक्रिया करून सोलां करतात. तांकां बाजारांत बरी मागणी आसा. सत्तरी म्हालांत व्हडा प्रमाणांत हाचें उत्पादन जाता. मात अंदूं मान्सूनपूर्व पावसान भिण्णांचीं सोलां उत्पादन करपी प्रक्रियेचेर वायट परिणाम निर्माण जाला.
मान्सूनपूर्व पावसाचो परिणाम
मान्सूनपूर्व पावसाचो भिण्णांच्या उत्पादनाचेर वायट परिणाम जाला. आजूनय भिण्णीच्या झाडांचेर भिण्णां लोंबकळटना दिसतात. हीं फळां काडून खर वतांत सुकोवप शक्य ना. कारण पावसान आडमेळीं निर्माण केल्यांत. हाका लागून तीं सुकोवपाक मेळनात अशें उत्पादकांचें म्हणणें आसा.
अर्थीक वेवस्थापन हालतलें
मजगतीं, सोलां तयार करप शक्य नाशिल्ल्यान तीं उत्पादन करपी उत्पादकांचें अर्थीक वेवस्थापन हालपाची शक्यताय आसा. वाळपयच्या बाजारांत व्हडा प्रमाणांत तीं विक्रे खातीर येतात. अंदूं मात बाजारांनी भिण्णांचीं सोलां चड दिसनात. तशेंच ह्या सोलांचो दरूय वाडपाची शक्यताय आसा.
मिरसांगेचेरूय परिणाम
अंदूं मान्सूनपूर्व पावसान मिरसांगेची लागवड केल्ली खरी मात ती पावसाक लागून पेड्ड्यार जाली. हाका लागून मिरसांगेंच्या उत्पादनाचेर परिणाम जाला. सत्तरींत पांचव्या मिरसांगांचें व्हडा प्रमाणांत उत्पादन जाता. हातुंततल्यान जायत्या कुटुंबाचीं पोटांय चलतात. अंदूं मात पावसाक लागून ह्या बर्याच शेतकारांक अर्थीक नदरेन फटको बसला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
