भांगरभूंय | प्रतिनिधी
आमच्या भारताक एक अध्यात्मीक दायज आनी धार्मीक परंपरा आसा. ख्रिस्ती धर्मांतूय साबार भाग्यवंत नमुने फावो जाल्यात. तांचे मदें भाग्यवंत गोंजालो गारसिया (वसय), भाग्यवंत आल्फोंसा (केरळ), भाग्यवंत यूवफ्रेसिया (केरळ), भाग्यवंत कुरियाकोस एलियास चावारा (केरळ), भाग्यवंत जोझेफ वाज (गोंय), कोलकोताची भाग्यवंत मदर तेरेजा, भाग्यवंत मारियांम थ्रेसिया (केरळ) आनी भाग्यवंत देवासाहाय पिळेय (तमिळनाडू). तशेंच जायतीं जाणां भाग्यवंतपणाचे वाटेर आसात. तांतलो एकलो म्हणल्यार आमचो गोंयचो पूत मान्यवंत फादर आग्नेल दे सौजा. आमी (नवेंबराचे 20 वेर) ताची 98 वी पुण्यतीथ समारंभतात. त्या निमितान, नवेंबराचे 11 ते 19 मेरेन नवेनाची कार्यावळ पिलार जाली.
मान्यवंत फादर आग्नेल दे सौजा हो पिलारचे संस्थेचो एक भाग्यवंत पाद्री आसलो. ताचो जल्म 1869 वर्सा, जानेराचे 21 वेर अंजुना गांवांत जालो. मिंगेल आरकांज मारियानो दे सौजा आनी मारिया सिनफोरोसा पेरपेता मागाल्हीस हांच्या भक्तीवंत कुटुंबांत तो जल्मलो. कुटुंबांत शिस्त, भावार्थ आनी दुसऱ्यांची सेवा आनी हुस्को हाचेर भर आसलो. ताची आवय, एक देवसंदेश्कार आसली म्हणटच शेजारच्या भुरग्यांक ती दोतोन शिकयताली. भुरगेपणांत थावन तो आयताराच्या मिसाक फादरान सांगलल्या सेर्मांवांची याद दवरतालो आनी वाड्यावेल्या भुरग्यांक सांगतालो. तांकां तो एकठांय करून दोतोन शिकयतालो. तो 11 वर्सांचो आसतना ताची आवय- बापूय सोंपलीं. देवाचेरूच पातियेवन जियेवंक तो शिकलो.
पाद्रीपणाची आकारणी घेतना तो लातीन भास शिकलो. रायतुरचे सिमिनारीत तत्वगिन्यांनाचें आनी धर्मशासत्राचें शिकप ताणें केलें. रायतुरचे सिमिनारीत आसतना धार्मीक जिविताचें ताका आपोवणें आयलें आनी तो पिलारचे संस्थेंत 1897 वर्सा जुलयाचे 17 वेर भितर सरलो. 1898 वर्सा सेतेंबराचे 24 वेर पाद्रीपणाची संस्कारणी घेतली. सादें, त्यागाचें आनी देवाक आपलें जिवीत समर्पण करून तो जियेलो.
पाद्री जाल्या उपरांत ताणें आपल्याक दिलल्या मिसांवां खातीर मनाची ओगेपणीं तयारी केली आनी उपरांत शिरोडेंच्या आनी सांवड्डें फिर्गोजांनी सेवा दिली. तशेंच कर्नाटकाच्या कुमठा फिर्गोजेंत तो पाद्री विगार आसलो. आपल्या मुणियारपणांत ताणें कुमसाराच्या संस्कारांचेर अधीक भर दिलो. तो एक व्हड प्रवचनकार आसलो. फिर्गोजकारांची गरज समजून घेवन, तांच्या कुटुंबांक भेट दितालो. तो एक भाग्यवंत पाद्री म्हूण भावार्थी ताचे कडेन पळेतालीं. ताच्या लिपलेल्या भाग्यवंतपणां वरवीं ताणें फिर्गोजकारांची मनां आनी काळजां जिखलेलीं. कोणूय कसलेय प्रस्न घेवन आयल्यार पासून, तांकां बरे तरेन समजायतालो आनी तांच्या मनांची बदलणी जाताली.
तो एक भागेवंत पाद्री म्हणटच, तेन्नाचे आर्चबिशप माथेवस दे ओलिवेरा शावियेर हाणीं ताका 1918 वर्सा मायाचे 20 वेर, रायतुरचे सिमिनारिचो आत्मीक गुरू कसो नेमलो. रायतुरचे सिमिनारींत तो आत्मीक बापूय, ओगेपणान दुसऱ्यां खातीर मागणें करपी आनी नमुनीक यादनीक जालो. फादर आग्नेल, अंतसकर्णा परमाणें तशेंच पवित्र मिसाच्या मोगान जियेलो. परम संस्कारा मुखार वरांचीं वरां सारतालो आनी प्राचीत मोगान वेंगयतालो. ताची अध्यात्मिक्ताय, पवित्र मिसाचे भेटेचेर, मारियेचेर, मिसियोनारी आनी देवाचे खुशियेक समर्पण करून जियेवपाचेर आदारलली आसली.
1927 वर्सा, नवेंबराचे 20 वेर रायतुरचे सिमिनारीत, जेजुच्या भोव पवित्र काळजाचे परबे दिसा, प्रवचन करताना तो कोसळ्ळो. ताका मरण आयलें. सकयल पडटच, जेजुचो आशिर्वाद घेता म्हणसर रावात म्हूण ताणें सांगलें. पवित्र मिसाचो ताका मोग कितलो आसलो, त्या दिसा दाखल जालें. ताचें शांत मरण जायत्यांक, ताका मानान भेट करुंक भाग्य मेळ्ळें. ताका रायतुरचे सिमितेरिंत निखिपितना, पाद्री विगार असो
उद्गारलो: “हांवें एका भाग्यवंताक निखिपिला.” त्या दिसा थावन, ताच्या फोंडाशीं भाविकांची गर्दी जाताली. भावार्थान आनी भरंवश्यान, ताच्या फोंडावेली माती लोक व्हरुंक लागलो. ताची संवसारी यात्रा सोंपली, पूण ताचें मिसांव चालू आसा म्हुण दाखल जालें.
आयज, मान्यवंत फादर आग्नेल, आमकां सगळ्यांक एक मार्गदर्शनीक उजवाड दिता. भाग्यवंतपण ओगेपणांतल्यान, सादेपणांतल्या आनी आमच्या जिविताच्या भेसाक विस्वाशिपणांतल्यानूय जोडूंक जाता म्हण ताचें निस्वार्थी जिवीत आमकां सांगता. आयज पिलारच्या दोंगुल्लेर हजारांनी लोक चडटात. कितें करुंक? ताची विनंती मागूंक येतात. जायत्यांक पेकोवणी मेळटा, थोड्यांक मनाचें समाधान फावो जाता. जायत्यांक ताचे विनवणेन देव नोकरी फावो करता. जायतीं जाणां ताका भाग्यवंत म्हूण पळेतात. तो तांचो भरवंसो जाता. देवाची खुशी आमी करून आमचें जिवीत जियेवंक तो आमकां भरवंश्याचो फोलेर. आयज जेन्ना, ख्रिस्ती भावार्थी आनी पिलारची संस्था ताची 98 वी पुण्याथिती पाळटात तेन्नां, मान्यवंत आग्नेलाची देख ताणीं घेवन फुडें वचुंक देवाक आमचीं मागणीं उबारुंया. आल्ताराचो मान ताका फावो जांवचो म्हणल्यार तो एका दिसा भाग्यवंत जातलो म्हूण आमी रावतात.
जॉन एम्. आल्फोंसो, कार्मेलीत
7666519837
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
