भांगरभूंय | प्रतिनिधी
पणजी : आम आदमी पक्षाच्या फुडार्यांनी मुख्यमंत्री डॉ. प्रमोद सावंत हांची वा तांचे घरकान्नीची मानहानी केल्ल्याचे पुरावे दिवचे. ताचे उपरांतूच आमी अब्रू लुकसाणेचो दावो वा हेर खंयचेय कारवायेक तयार आसात, अशी प्रतिक्रिया पक्षाचे फुडारी वाल्मिकी नायक हांणी उक्तायल्या. बिरेस्तारा पणजे जाल्ले पत्रकार परिशदेंत ते उलयताले. ह्या वेळार फ्रान्सिस कुएलो, रोहन नायक आनी सलमान खान हजर आशिल्ले.
गोंयचे आदले राज्यपाल सत्यपाल मलिक हांणी मुख्यमंत्री आनी तांचे घरकान्नीचें नांव घेतिल्लें. ते जें कितें उलयले तेंच आमी परत सांगलें. मुख्यमंत्र्यांनी पयलीं तांचेर अब्रू लुकसाणेचो दावो करचो. आमीय खंयचेय कारवायेक तयार आसात. ह्या प्रकरणांत भाजप सरकार विरोधकांक भेकडावपाचो यत्न करता. मात आमी शांत रावचे ना, अशें वाल्मिकी हांणी म्हणलें.
हें प्रकरण जेन्नाच्यान सुरू जालां तेन्नाच्यान दुबावीत वा कागाळदारांक अप्रत्यक्षपणान भंय घालतात. पयलीं ‘दुबावितांची मालमत्ता जप्त करतले’, अशें सांगून तांकां ओगी केले. उपरांत ‘पयशे दिवप्यांचेर कारवाय करतले’ अशें म्हणून कागाळदारांक भंय घालो. हाचे उपरांत ह्या प्रकरणांत कागाळी येवपूय उणें जालें. सध्या ईडी ह्या प्रकरणांचो तपास करपा बदला कागाळदारांक लक्ष्य करता असो गंभीर आरोप वाल्मिकी हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
