मानसीक भलायके खातीर योग प्रभावी: डब्ल्यूएचओ

भांगरभूंय | प्रतिनिधी

गोंय आनी ऋषिकेश हीं योगाचीं तीर्थक्षेत्रां

नवी दिल्ली, खबरां संस्था ः भारताचें पुर्विल्लें संस्कृतीक दायज म्हळ्यार ‘योग’. हो योग दायज आयज संवसारीक उत्सव जालां. संवसारभरांतल्या लाखांनी लोकांचें जिवीत शारिरीक, मानसीक आनी आध्यात्मिक नदरेन समृध्द करपाक लागलां. आयज योग भारतांतच न्हय तर संवसाराच्या दर एका कोनशांत भलायकी आनी शांततायेचें प्रतीक जालां.
भारतांत योगा विशीं उलयतना पयलें नांव मनांत येता तें बाबा रामदेव, जे योग गुरू म्हणून फामाद आसा. भारतांत योगांत बाबा रामदेव हांची भुमिका उल्लेखनीय आसा. तांणी 1995 वर्सा दिव्य योग मंदिर ट्रस्ट आनी 2006 वर्सा पतंजली योगपीठ स्थापन करून योग आनी आयुर्वेदाचो प्रसार जनते मेरेन केलो.

संवसारीक पांवड्यारुय योगाची खाशेली सुवात….

रामदेव बाबान योग सरावाचेर भर दिल्ल्यान भस्त्रिका, कपालभाती आनी अनुलोम-विलोम सारकिल्ले व्यायाम लोकप्रिय जाल्यात, जे ताण आनी गोडेंमूत ह्या सारक्या सामान्य भलायकी समस्यांचेर उपचार करपाक प्रभावी आसात. 2015 वर्सा दिल्लीच्या जवाहरलाल नेहरू स्टेडियमांत 5200 लोकां वांगडा योग दीस सराव केलो आनी 2017 वर्सा अहमदाबादांत 3 लाख लोकां वांगडा संवसारीक विक्रम केलो. बाबा रामदेवाच्या फुडारपणा खाला योगान संवसारीक पांवड्यार आपली खाशेली सुवात मेळयल्या.

मानसीक भलायके खातीर योग प्रभावी: डब्ल्यूएचओ

योगाची लोकप्रियता जावपाचें कारण म्हळ्यार ताची समग्र पद्दत. तो फकत शारिरीक व्यायाम न्हय तर मानसीक शांती आनी भावनिक समतोल दिता. आसन, प्राणायाम आनी ध्याना वरवीं लोकांक ताण, चिंता आनी कांय दुयेसां पसून सुटका मेळपाक लागल्या. संवसारीक भलायकी संघटनेनय (WHO) मानसीक भलायकी आनी जिणे पद्दती संबंदीत आशिल्ल्या दुयेंसांचें वेवस्थापन करपाक योग प्रभावी आसा अशें वर्णन केलां.

ऋषिकेश आनी गोंय योगाची तीर्थक्षेत्रां

आयज योगान संस्कृतीक आनी भौगोलिक मर्यादा हुपल्या. हॉलीवूड स्टार ते कॉर्पोरेट कर्मचारी मेरेन सगळेच आपल्या दिसपट्ट्या जिणेपद्दतीत योगाचो आस्पाव करतात. भारतांत अय्यर, बिहार स्कूल ऑफ योगा, पतंजली ह्या संस्थांनी आधुनीक स्वरुपांत योगाची सुरवात केल्या, ताका लागून तो तरणाट्यां मदींय लोकप्रिय जालां. ऋषिकेश आनी गोंय सारकिल्लीं राज्यां योग शिकप्यां खातीर तीर्थक्षेत्रां जाल्यांत.