भांगरभूंय | प्रतिनिधी
पणजीः मानसीक भलायकी समस्या सोडोवचे खातीर गोंय सरकारान सुरू केल्ले टेली मानस हे हेल्पलायन सेवेक दिसाक सरासरी 16 जाण कॉल्स करतात, अशी म्हायती मेळिल्ली. हाचोच अर्थ हेल्पलायनीक म्हायन्याक सरासरी 461 जाण कॉल करून फोना वरवीं समुपदेशन घेतात. आतां मेरेन हे सेवे खातीर गोंयभरांतल्यान वट्ट 6 हजार कॉल्स आयल्यात.
लोकांची मानसीक भलायकी बरी उरची हे खातीर केंद्र सरकारान ऑक्टोबर 2020 त टेली मानस ही फुकट फोन समुपदेशन सेवा देशभर सुरू केल्ली. गोंयांत ही सेवा 15 मे 2023 ह्या दिसा सुरू जाली. गोंयांत ही सेवा मानसोपचार आनी मानवी वर्तन संस्थे वतीन (आयपीएचबी) दितात. 15 मे 2023 ते 30 मे 2024 ह्या काळांत फोन सेवेक 6 हजार कॉल्स आयल्यात.
गोंयांतली टेली मानस ही सेवा आदीं फक्त सकाळीं 9 ते सांजेच्या 4 वरां मेरेन उपलब्ध आशिल्ली. मात हे सेवेक मेळपी वाडपी प्रतिसाद पळयत जाल्यार ती 24 x 7 उपलब्ध करून दिल्या. ही सेवा कोंकणी, मराठी, हिंदी आनी इंग्लीश भाशेंत उपलब्ध आसा. आयपीएचबीसयत दक्षीण गोंय जिल्हो हॉस्पिटलांत टेली मानस सेल (विभाग) सुरू केला. गरज पडल्यार कॉल केल्ले व्यक्तीक थेट पद्दतीन लेगीत समुपदेश करतात.
समुपदेश करतना तणाव कसो टाळचो, अतिहुतहुतेपणां कशी उणीं करचीं, नातें संबंदांतलो तणाव उणो करप, फोबिया वयले उपाय, एकसुरेंपण उणे करप हे विशींची म्हायती दितात. हें समुपदेसन तज्ञ समुपदेशकां वरवीं करतात. हो संवाद पुराय तरेन गुप्त दवरतात.
मेळिल्ले म्हायती प्रमाण हे सेवे खातीर भोवतेक कॉल्स हे 20 ते 30 वर्सां पिराय गटांतल्या तरणाट्यांचे आशिल्ले. चडशे कॉल हे नाते संबंदांतल्यो कागाळी, कामाचो आनी परिक्षेचो ताण, निरशेवणी संबंदांत आशिल्ले.
देशभरांतल्यान 10 लाख कॉल
पुराय देशाचो विचार केलो जाल्यार 29 मे मेरेन हे सेवे खातीर सुमार 10 लाख कॉल आयल्यात. देशभरांत हे सेवे खातीर दिसाक सरासरी 3 हजार 500 कॉल आयल्यात. देशभरांत 23 मुखेल संस्था, 51 विभागीय कार्यालयां आनी 5 विभागीय समन्वय केंद्रां वरवीं ही सेवा दितात. देशभरांत खंयूय हे सेवेचो लाव घेवचे खातीर 14416 वा 18008914516 अशे दोन टोल फ्री नंबर जारी केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
