भांगरभूंय | प्रतिनिधी
नवी दिल्ली, खबरां संस्था ः फाटल्या कांय दिसां सावन नागरिकां मदीं मानसीक दुयेंसांची समस्या वाडत आसा. पूण देशांतल्या उण्या उत्पन्नाच्या व्यक्तींच्या तुळेंत चड उत्पन्न आशिल्ल्या व्यक्तीं मदीं मानसीक दुयेंसांचें प्रमाण चड आशिल्ल्याचें एका सर्वेक्षणांतल्यान दिसून आयलां. देशांतल्या चड उत्पन्न आशिल्ल्या लोकां मदीं मानसीक समस्यांचें प्रमाण 1.73 पटींनी चड आसा अशें जोधपूर आयआयटीन केल्ल्या सर्वेक्षणांतल्यान दिसून आयलां.
इंडियन इन्स्टिट्यूट ऑफ टेक्नॉलॉजी, जोधपूर हे संस्थेन हालींच भारतीयां मदीं मानसीक दुयेंसां विशीं सर्वेक्षण केलां. ह्या सर्वेक्षणांत देशांतल्या 5 लाख 55 हजार 115 लोकांचो वांटो आशिल्लो. हातूंत गांवगिऱ्या वाठारांतले 3 लाख 25 हजार 232 नागरिक आनी शारांतले 2 लाख 29 हजार 232 नागरिकांचो आस्पाव आशिल्लो. ह्या सर्वेक्षणा खातीर 8 हजार 77 गांवांचे लोकांची आनी 6 हजार 181 शारांतल्या नागरिकांची निवड केली. मानसीक दुयेंसांतल्यान ग्रस्त आशिल्ल्यां मदल्या 283 दुयेंतींचेर बाह्यरुग्ण विभागांत, जाल्यार 374 दुयेंतींचेर हॉस्पिटलांत उपचार सुरू आशिल्ले. देशांतल्या उण्या उत्पन्नाच्या नागरिकां परस चड उत्पन्न आशिल्ल्या व्यक्तीं मदीं भलायकी समस्यांचे प्रमाण 1.73 पटींनी चड आशिल्ल्याचें दिसून आयलें. तेच प्रमाण मानसीक दुयेंसा विशीं व्यक्त जावपाचे प्रमाण 1 टक्क्यां परस उणें आशिल्ल्याचें दिसून आयलें. मानसीक दुयेंसा विशीं व्यक्त जावपाचे प्रमाण नागरिकां मदीं उणें आसा देखून ताचो फुडाराक तांचेर गंभीर परिणाम जाता. 2017-18 वर्सा केल्ल्या 75व्या राष्ट्रीय नमुन्याच्या सर्वेक्षणाच्या आदाराचेर हें सर्वेक्षण केलां. 2017 वर्साच्या राष्ट्रीय मानसीक भलायकी सर्वेक्षणांतल्यान भारतांतल्या सुमार 197.3 दशलक्ष लोकांक मानसीक दुयेंस आशिल्लें.
देशांतल्या नागरिकांच्या मानसीक भलायके संबंदीं केल्ले हे सर्वेक्षण इंटरनॅशनल जर्नल ऑफ मेंटल हेल्थ सिस्टीमांत उजवाडाक आयलां. हें सर्वेक्षण आयआयटी जोधपूरच्या स्कूल ऑफ लिबरल आर्ट्स विभागाचे सहाय्यक प्राध्यापक डॉ. आलोक रंजन आनी अमेरिकेंतल्या ओहायो स्टेट युनिव्हर्सिटींतल्या स्कूल ऑफ हेल्थ अँड रिहॅबिलिटेशन सायन्सेसचे डॉ. ज्वेल क्रस्टा हांणी मेळून केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
