भांगरभूंय | प्रतिनिधी
कांसावलेची घडणूक: पांच दुबावितांक अटक, सात दिसांची पुलीस कोठडी
भांगरभूंय । प्रतिनिधी
मडगांवः मानसीक दुयेंत चलयेचें फातोडडेंच्यान अपहरण करून तिका कांसावली व्हरून तिचेर सामुहीक बलात्कार (गँगरेप) करपाची घडणूक 22 जानेवारीक राती वेळार घडली. ह्या प्रकरणांत फातोड्डें पुलिसांनी गुन्यांव नोंद करून पांच दुबावितांक अटक केल्या. दुबावितांक न्यायालयांत हाजीर केले तेन्ना तांकां सात दिसांची पुलीस कोठडी फर्मायली.
दक्षीण गोंय पुलीस अधिक्षक सुनिता सावंत हांणी दिल्ले म्हायती प्रमाण, 22 जानेवारीक रातच्या 8 ते फांतोडेर 3.30 वरां ह्या काळांत गँगरेपाची घडणूक घडली. हे संबंदांत मानसीक भलायकी सारकी नाशिल्ले पिडिताचे आवयन फांतोड्डें पुलीस स्टेशनाचेर कागाळ नोंद केली. ह्या प्रकरणांतले दुबावीत आदील अब्दुल करीम लाबसाब अलगर (18, रा. विद्यामंदिर चिखली, वास्को), मोहम्मद अली मुल्ला (22, रा. मांगुरहील, वास्को), शाहजाद मोहम्मद समीम शेख (18, रा. खारीवाडो, वास्को), विरेश अमरीश अग्वांदा (18, रा. गांधीनगर, वास्को) आनी मोहम्मद यासिर हबिबुल्ला शेख (18, रा. सडा, वास्को) हांकां अटक केल्या.
फांतोड्डेंच्या मडगांव कदंब बसस्टॅण्डा वयल्यान दुबावीत आदील अलगर हाणें पिडितेक मडगांव सावन बशींतल्यान वास्को बसस्टॅण्डार घेवन गेलो. ते उपरांत आदीलान पिडितेक आपले दुचाकीचेर बसोवन दाबोळी जंक्शनाचेर व्हेली. थंय आदीला सयत शाहजाद, विरेश, मोहम्मद यासीर आनी मोहम्मद मुल्ला हांणी पिडितेक बोलेनो मोटारींतल्यान कांसावलेच्या एका गेस्ट हावसांत व्हेली. थंय आदीला सयत हेर चार जाणांनी पिडितेचेर लैंगीक अत्याचार केले. ते परांत पिडितेक नुवें जंक्शनाचेर हाडून सोडली. थंय मडगांवां वचपा खातीर ती लिफ्ट घेवपाक राविल्ली. त्या वेळार हाची म्हायती पुलिशेक दिली. पुलिसांनी तिची वासपूस केले उपरांत हो प्रकार उजवाडाक आयलो.
ह्या प्रकरणांत पिडितेचे आवयन कागाळ केले उपरांत फांतोड्डें पुलिसांनी गुन्यांव नोंद केलो. दक्षीण गोंय पुलीस अधिक्षक सुनिता सावंत हांच्या मार्गदर्शना खाला फांतोड्डें पुलीस निरिक्षक नाथन आल्मेदा, वेर्णा पुलीस निरिक्षक मेल्सन कुलासो, महिला पुलीस उपनिरिक्षक रियांका नायक, केपें पुलीस निरिक्षक अर्जून सांगोडकार आनी हेरांचे पंगड घडयले. सीसीटीव्ही मॅपिंगा वरवीं दुबावितांची वळख पटयली आनी तांकां अटक केली. ह्या प्रकरणांत दुबावितांनी वापरिल्ल्या गाडयां सयत पांच मोबायल फोन जप्त केल्यात. ह्या प्रकरणांत दुबावितांक न्यायालयांत हाजीर केले तेन्ना पांचूय दुबावितांक सात दिसांची पुलीस कोठडी फर्मायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
