भांगरभूंय | प्रतिनिधी
मानसिक ताणाचो आमचे भलायकेचेर वायट परिणाम जाता. मानसीक ताणांतल्यान जायत्यो समस्या निर्माण जातात. ह्या ताणाक लागून दुयेंसां जावपाक लागल्यात आनी मागीर आमचो ताण परतून सुरू जाता आनी हें अशेंच चालूच उरता. मानसिक ताणाक लागून गोडेंमूत, कोठ्याची पिडा, वांझपण येवप, टक्कल पडप, निद्रानाश, उदासीनताय अश्यो समस्या जातात.
तज्ञांच्या मतान ताण हें काळजाचो आताक येवपाचें एक मुखेल कारण. आमी शारिरीक रितीन फिट रावपाचो यत्न करतात, पूण मानसीक भलायके कडेन दुर्लक्ष करतात. जायते फावटीं शारिरीक नदरेन फिट आशिल्लो मनीस लेगीत कसल्या ना कसल्या ताणांत आसता. हालींच्या काळांत काळजाच्या दुयेंसांचें प्रमाण वाडत आशिल्ल्यान शारिरीक भलायके वांगडाच मानसीक भलायकीय काळजाचे भलायकेक जापसालदार आसा.
जायत्या घटकांक लागून काळजाच्या दुयेंसांचो धोको वाडटा. धूम्रपान, सोरो पियेवप, रगतदाबाची समस्या, साकर, आधुनीक जिणे पद्दत, चड वजन आनी चड कोलेस्टेरॉल अशे घटक तरणाट्यांक काळजाचो आताक वाडपाक जापसालदार आसात. हाचे वांगडाच आनीक एक जोखीम घटक म्हळ्यार उदासीनताय आनी समाजीक ताण, जाका लागून काळजाच्या दुयेंसांचोय धोको वाडटा. संवसारीक अभ्यास केल्ल्यान मानसोपचारीक घटकांक लागून ताण येवपाचो धोको देड ते दोन पटींनी वाडटा अशें दिसून आयलां.
० देखून आमचे शारिरीक भलायके वांगडाच आमी आमची मानसीक भलायकीय निरोगी दवरपाक जाय.
० दर दिसा व्यायाम करप वा चलप, कारण जायत्या संशोधनांतल्यान दिसून आयलां की जेन्ना आमी व्यायाम करतात वा चलतात तेन्ना आमच्या कुडींत बरें हार्मोन वाडटात, जे आमचे मानसीक भलायके खातीर खूब फायदेशीर आसतात.
० तुमकां आवडटा तें काम करचें, दर दिसा तुमकां आवडटा तें करपाचो यत्न करात, जशें बागकाम, संगीत आयकप, नाचप, चित्रकला, डायरी बरोवप.
० दीसभर ‘मी टायम’ घेयात, म्हळ्यार दिसाक उण्यांत उणीं 10-15 मिनटां स्वता खातीर घेयात आनी खंयच्याय गजालीचो विचार करचे परस आराम करात.
० ध्यान करात, दिसपट्ट्या ध्यानाक लागून तुमची ताण पातळीय उणी जातली, देखून तुमच्या दिसपट्ट्या वेव्हारांत योग वा ध्यानाचो आस्पाव करचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
