मानसिकतायेची जडण- घडण

भांगरभूंय | प्रतिनिधी

मानसिकता निर्माण जावपाक कुटुंबाची भुमिका खूब म्हत्वाची. भुरगीं कितें पळयतात, आयकतात आनी अणभवतात ताचो तांच्या विचारांचेर व्हड परिणाम जाता.

मनशाचें व्यक्तीमत्व फकत ताची कूड थारायना, पूण तें ताच्या विचारांचेर आनी मानसीकतेचेरूय आदारून आसता. मनशाची विचार करपाची, निर्णय घेवपाची आनी परिस्थितीक जाप दिवपाची पद्दत म्हळ्यार मानसिकताय. मनशाचे मानसिकतेची निर्मिती म्हळ्यार ताची निर्मिती. हे प्रक्रियेचेर जायते घटक परिणाम करतात – कुटूंब, समाज, शिक्षण, अणभव, आनी माध्यमां ह्या सगळ्यांचो मुखेल वांटो आसता
मानसिकता निर्माण जावपाक कुटुंबाची भुमिका खूब म्हत्वाची. भुरगीं कितें पळयतात, आयकतात आनी अणभवतात ताचो तांच्या विचारांचेर व्हड परिणाम जाता. घरांत शांती, मोग, संवाद, सहकार आसत जाल्यार त्या वातावरणांत वाडपी भुरग्यांची मानसिकताय सकारात्मक आनी समजून घेवपी जाता. उरफाटें घरांत सतत झगडीं, ताण आनी अस्थिरताय आसल्यार भुरग्यांचें मनांत लेगीत भंय, उदासीनताय, राग अशो नकारात्मक मानसिकताय निर्माण जावपाची चड शक्यताय आसता. शिक्षण हो मानसीक उदरगतीचो दुसरो म्हत्वाचो खांब. शाळा आनी शिक्षक भुरग्यांच्या मनांत खोलायेन छाप सोडटात. शिक्षकांचीं उतरां, वागणूक, शिकोवपाच्यो पद्दती हांचो भुरग्यांच्या विचारांचेर व्हड परिणाम जाता.स्वतंत्र विचारांक पोसवण दिवपी, दुबाव पयस करपी आनी आत्मविस्वास निर्माण करपी शिक्षण वेवस्थेंत विद्यार्थ्यांची मानसिकताय खोलायेन, उक्त्या विचारांची आनी सकारात्मक जाता.
मनीस हो समाजीक प्राणी. देखून समाजांत रावतना जायत्या गजालींचो ताचेर परिणाम जाता. इश्ट, सोयरे, शेजारी, शाळेचे वांगडी – हे सगले मानसिकतेचेर परिणाम करपी घटक.सकारात्मक विचार आनी प्रेरणादायी वागणूक आशिल्ल्या मनशांचो संपर्क आयल्यार ताची मानसिकताय चड आशावादी आनी वेव्हारीक जाता. पूण ती नकारात्मक, नकारात्मक वृत्ती आशिल्ल्या गटांत आसल्यार तिची मानसिकतायय तेच तरेन बदलता.आयच्या म्हायती तंत्रगिन्यानाच्या काळांत सोशल मिडिया, टीव्ही, सिनेमा, इंटरनॅट हांचो मनशाच्या मानसिकतायेचेर व्हड परिणाम जाता. विचारांक आमी पळयतात, आयकतात आनी वाचतात तशे ते आकार घेतात.
मानसिकता निर्माण जावपाक तांचो खूब व्हड वांटो आसता. मनशाक ज्यो अडचणी येतात, ताचे कडल्यान शिकतात ते धडे, संघर्शांतल्यान मेळपी आत्मविस्वास हें सगलें ताच्या विचार प्रक्रियेक आकार दितात.केन्ना केन्ना अपेस, दुख्ख वा अन्याय आमकां थकवंक शकता, पूण त्या अणभवांतल्यान शिकप आनी मानसीक नदरेन बळिश्ट जावप हें मानसिकतेचें परिपक्व रूप.भुरगेपणासावन मनशाच्या मनांत कोरांतिल्ले आचार आनी विचारांचे छाप म्हळ्यार संस्कार. सत्य, अहिंसा, सहकार, जापसालदारकी, आत्मनिर्भरताय हीं मुल्यां जेन्ना अंतर्गत जातात तेन्ना मनीस सकारात्मक, समजून घेवपी आनी धीर धरपी जाता.
सध्या ह्या मूल्य शिक्षणा कडेन दुर्लक्ष जालां अशें दिसता, हाका लागून जायते तरणाटे दिकाहीन जावपाक लागल्यात. मानसिकता निर्माण जावपा खातीर मूल्य शिक्षण खूब म्हत्वाचें. मानसिकतेचे निर्मितींत मानसीक भलायकेचोय विचार करचो पडटा. आयचे ताणभरीत जिणे पद्दतीक लागून जायते लोक ताण, उदासीनताय आनी चिंतेचो बळी पडटात. हाचो परिणाम तांच्या निर्णय घेवपाचे आनी विचार करपाचे कुशळटायेचेर जाता. मानसीक भलायकी बरी दवरपा खातीर योग, ध्यान, व्यायाम, वेळावेळार समुपदेशन दिवप उपेगी पडटा. मनशाची मानसिकताय ही एकदां तयार जाल्ली गजाल न्हय. जल्मा सावन मरणा मेरेन ती सतत बदलत आनी विकसीत जायत आसा. देखून मानसिकतायेची निर्मिती ही एक अखंड प्रक्रिया. योग्य वातावरण, सकारात्मक अणभव, मोलाचेर आदारिल्लें शिक्षण आनी मानसीक भलायकी एकठांय येवन एक घटमूट, सकारात्मक आनी समतोल मानसिकताय तयार जाता. ही मानसिकताय व्यक्तीमत्वाक आनीक आकार दिता आनी येसस्वी जिणेची बुन्याद घालता.

सुदिन वि. कुर्डीकार.
8275425404