भांगरभूंय | प्रतिनिधी
केंद्रीय बायलां आनी भुरगीं उदरगत राज्यमंत्र्यांची राज्यसभेंत म्हायती
भांगरभूंय । प्रतिनिधी
पणजी : गोंयांत 2018 ते 2022 ह्या पांच वर्सांच्या काळांत शिंदळकी वेवसाय खातीर हाडिल्ल्या 258 बायलांची सुटका करपाक येस आयलां. पुलीस खात्यान ही कारवाय केल्या. केंद्रीय बायलां आनी भुरगीं उदरगत राज्यमंत्री सावित्री ठाकूर हांणी राज्यसभेंत दिल्ले लेखी जापेंतल्यान ही म्हायती मेळ्ळ्या. हे संबंदांत खासदार डॉ. अशोक कुमार मित्तल हांणी अतारांकीत प्रस्न विचारिल्लो.
जापेंत दिल्ले म्हायती प्रमाण 2018 त महिला मानवी तस्करीचीं 55 प्रकरणां नोंद जाल्लीं. तातूंत 102 बायलांची सुटका करपाक पुलिसांक येस आयिल्लें. 2019 त 38 प्रकरणांतल्यान 90 बायलांक, 2020 त 17 प्रकरणांनी 30 बायलांक, 2021 त 15 प्रकरणांतल्यान 35 बायलांक जाल्यार 2022 त एका प्रकरणांतल्यान एके बायलेची सुटका करपाक पुलिसांक येस आयिल्लें. वयल्या काळांत देशभरांत 29 हजार 384 बायलांची मानवी तस्करींतल्यान सुटका केल्ली. देशांत 2018 ते 2022 ह्या काळांत मानवी तस्करीच्यो 10 हजार 639 कागाळी नोंद जाल्ल्यो. वयल्या काळांत महाराष्ट्रांत सगळ्यांत चड 1392 प्रकरणां नोंद जाल्लीं. हे मजगतीं थंयच्यान 4063 बायलांची सुटका केल्ली. जाल्यार नागालॅण्डांत सगळ्यांत उण्यां, 3 प्रकरणांत 20 बायलांची सुटका केल्ली. 2022 त गोंयांत मानवी तस्करीच्या वट्ट 15 प्रकरणांनी न्यायालयीन सुनावणी पुराय जाल्या. तातूंतल्या 14 प्रकरणांत दुबावितांची सुटका जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
