भांगरभूंय | प्रतिनिधी
भांगरभूंय । प्रतिनिधी
पोरणे गोंयः गोंय सरकार आपल्या ‘हर घर जल‘ येवजणे विशीं जायरात करता माद दिसान दीस वेगवेगळे प्रकार सामकार येतात. खोर्ली (तिसवाडी) पंचायत वाठारांतल्या मानगादो हांगा 20 घरांक फकत नळ कनेक्शनां दिल्यांत. तातूंतल्यान उदकाचो एक थेंब लेगीत येना. समाज वावुरपी मारयाण फेर्रांव आनी राजन घाटे हांणी व्हो प्रकार सामकार हाडला.
मानगादो वाठारांत आमी फाटल्या धा वर्सां सावन रावतात. आमका नळाचें उदक मेळना. टॅन्कारान आमका उदका पुरवण जाता. देड वर्सा आंदीं आमच्या घराक नळ कनेक्शन दिल्लें, मात हा वेळ सावन तातूंतल्यान उदक आयलें ना अशें इशाक शेख हाणे सांगलें.
जी शेख हाची गजाल आसा तशीच हांगच्या सुमार 20 घऱांची आसा. बांदकाम खात्याच्या अधिकाऱ्यांनी आमकां नळ बसोवन दिल्यात. मात नळ आसून लेगीत आमका टॅन्कराच्या उदकाचेर निंबून रावचें पडटा अशें ह्या घरांतल्या लोकांनी सांगलें. दर म्हयन्यांक एका घराब्याक पांच टॅन्कर लागतात. आमी पियेवपाक हेच उदक वापरतात आनी ताका लागून भलायकेच्यो समस्या उप्रासतात अशी म्हायती तांणी दिली.
बांदकाम खात्याच्या अधिकाऱ्या कडेन संपर्क सादलो तेन्ना या वाठारांत उदका टांकी बादले बगर थंय नळाक उदक येवप शक्य ना अशें तांणी सांगलें. नळांक उदक येवचें म्हणून पंप बसयला. मात तो उदक ओडून घेना अशी म्हायती तांणी दिली.फाटल्या धा वर्सां सावन आमी खोर्ली पंचायत मंडळाच्या दरेका सरपंचा कडेन टाकीं बांदपा खातीर जमीन उपलब्द करून दिवची अशी मागणी करीत आसात अशेंय तांणी सांगलें. बांदकाम खातें आपल्या टॅन्करांनी उदका पुरवण कित्याक करनात अशें विचारलें तेन्ना ते दिकेन आमये यत्न सुरू आसात अशें तांणी सांगलें.
बॉक्समानगादो हांगा जी 20 घरां बांदल्यान तीं नगर नियोजन खात्या कडल्यान परवानगी बगर बांदल्यात. लोकांनी जमनीचे प्लॉट विकते घेतल्यान मात घऱां बांदपाक खात्याची परवानगी घेतिल्ली ना अशी म्हायती खोर्लीचो सरपंच बाप्तिस परेरा हाणे दिली. फाटल्या चार म्हयन्यां सावन हांव सरपंच आसा. पूण ह्या घऱांक नळाचें उदक मेळना ही गजाल कोणचे म्हजे नदरेक हाडून दिलीं ना. पंचायतीन तांका घर नंबर दिल्यात. ताका उदक मेळचें म्हणून यत्न करपाचें उतर परेरान दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
