भांगरभूंय | प्रतिनिधी
पणजीः मानकुराद आंबे लावपा खातीर सरकार १ हॅक्टर फाटल्यान २ लाख मेरेनची सबसीडी दिता. आमी जाण्ट्यांनी लायिल्ले आबें खातात. देखून हें उत्पन्न वाडोवपा खातीर नवीं मानकुराद रोपां लावपाक सुरवात करपाक जाय. मानकुरादांक जीआय टॅग दिवपाची प्रक्रीया निमाण्या पांवड्यार आसा, अशी म्हायती मुख्यमंत्री डॉ प्रमोद सावंत हांणी दिली.
गोंयच्या मानुकरादाक गोंयतूच न्हय गोंयां भायरूय व्हडली मागणी आसा. मात दर वर्सा मानकुरादाचें उत्पन्न देंवत आसा. हें उत्पन्न वाडोवपा खातीर आमकां आनीक मानकुरादाचीं कलमां दिवपाक सुरवात करपाक जाय, अशी मागणी साळगांवचे आमदार केदार नायक हांणी सभाघरांत केली.
हे विशीं जाप दितना शेतकी मंत्री रवी नायक हांणी सांगलें, खातें आबें आनी कवाथ्यांची कलमा दित आसात. मानकुराद आंबो आयात करपा खातीरची मागणी लेगीत भरपूर आसा देखून गोंयकारांनी मानकुराद लावपाक सुरवात करची. आंब्याचो रोपो लावपाक मारपी दर फोंडा फाटल्यान सरकार रु. ६०० इतलें अनुदान दिता.
हे विशीं आनीक म्हायती दितना डॉ. प्रमोेद सावंत हांणी, हापूस आंब्याचे तुळेंत मानकुरादाक जी रुच आसा ती खयच्याच आंब्याक ना. आतां आमी फकत जाण्ट्यांनी लायिल्ले मानकुराद आंबे खायत आयल्यात. जर मानकुरादाचें उत्पन्न वाडयतले आसत जाल्यार आतांचे पिगळेन नवे मानकुराद आंब्याच्या रोपांची लागवड करपाक सुरवात करप गरजेचें. एक हॅक्टर सुवातेंत मानकुरादाचे लागवडी खातीर सरकार २ लाख इतलें अनुदान दिता. ते भायर मानकुरादाक जीआय टॅग दिवपाची प्रक्रीया निमण्या पांवड्यार पावला, अशी म्हायती मुख्यमंत्र्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
