भांगरभूंय | प्रतिनिधी
सरकाराचें अनुदान, सवलत, येवजण्यो कांय थारावीक बागायतदार, शेतकार सोडल्यार हेरां मेरेन पावनात.ो
आंब्याक लोकगीत, संस्कृतींत, नाचांत म्हत्वाचें स्थान आसा. ‘आंबा पिकतो रस गळतो, कोंकणचा राजा बाई झिम्मा खेळतो….!’ हो हापूस आंबो. पूण सगल्यांत रुचीक आशिल्ल्या आमच्या गोंयच्या मानकुराद आंब्याक महाराजाचो भोवमान मेळपाक जाय आशिल्लो. हापूस हो मूळ गोंयचो आल्फांसो, आफोंस. तो व्हड प्रमाणांत निर्गत जाता, मानकुरादाच्या नशिबांत मात तें भाग्य ना. विधानसभेंत काल मानकुराद पावलो. नवीं कलमां लावप्यांक हॅक्टरा फाटल्यान दोन लाखां मेरेनचें अनुदान दितात. पूण अजून बरेच गोंयकार जाण्ट्यांनी लायिल्ले आंबेच खातात. उत्पन्न वाडोवपाचो यत्न करपी भोव थोडे. मानकुरादाक जीआय टॅग दिवपाची प्रक्रिया चलता. खंयच्याय खिणाक तें मेळपाक शकता. मानकुरादाक तशी खूब मागणी. गोंयांत तो अळम्या भशेन तोंडाक येता त्या मोलाक खपता. पूण फाटल्या कांय वर्सांनी ताचें उत्पन्न देंवलां. ही हुस्क्याची गजाल. हाचे खातीर नवीं कलमां लावपाक जाय.
सध्या गोंयांतले 80 टक्के शेतकार एक हॅक्टरा परस उणे जमनीचेर शेत करतात. आंब्याची लागवड 5071 हॅक्टरां वयल्यान साडेसात हजार हॅक्टरांचेर व्हरपाची सरकाराची इत्सा आसा. पूण ते खातीर सगल्यांत म्हत्वाची जमीन. गोंयकारां कडेन अशी कितलीशी जमीन उरल्या? आंबो लागवडीक उर्बा दितना आतां गोंयकारां वांगडाच गोंयांत जमनी घेतिल्ल्या उत्तर भारतीय आनी हेर लोकांक आंब्याचें म्हत्व पटोवन दिवचें पडटलें. रस्त्या देगेक शेंकड्यांनी आंबे आसात. मात तांकां फळ धरताच अशें ना. 50 वर्सां पसून एकूय फळ लागूंक नाशिल्ले आंब्याचे रुख आसात. ही कलमां कोणें केल्लीं काय? आंब्यांच्या वेवसायांत कांय थरावीक घराबेच आसात. अत्याधुनीक पद्दतीन आंब्याची शेती केल्यार एकरा फाटल्यान पांच लाखां वयर जोडूं येता. एक रोंप रोंवपाक सरकार सशें रुपया दिता. ताचे भायर सारें, उदक, कीडनाशक हाचेरूय अनुदान आसा. जाय ती फक्त आंब्याची लागवड करपाची इत्सा. मुळांत भुरगे, तरणाट्यांची शेतांची आवड ना जाल्या. कारण थंय कश्ट करचे पडटात. फक्त एक आदेश काडून सगल्या विद्यार्थ्यांक शेतांनी देंवयले म्हणून हरीत क्रांती जावची ना. तरातरांचीं फळां, भाजयो, फळभाजयो, भात हांचें पीक देंवलां. फक्त रोख रक्कम दिवपी पिकांकूच शेतकार हात घालतात. मानकुरादाची निर्गत करपाक सरकारान पेंगट बांदून वावराक लागचें पडटलें. खुद्द कृशी मंत्र्यान स्वताच्या बोल्सांतल्यान दोन लाख रुपयां वयर इनामांची घोशणा केल्या. जे विभागीय शेतकी अधिकारी लागवडीची जमीन वाडयतले, तांकां हीं इनामां मेळटलीं.
मानकुराद आंबो लागवड संघटणेंत चाळीसां वयर शेतकार आसात. राज्यांत आंब्यांच्यो 77 (पयलीं 135 आशिल्ल्यो.) जाती आसात. पयलीं चड आशिल्ल्यो म्हणजे कांय नश्ट जाल्या आसतल्यो. आदल्या सगल्या जातींक पुनरुज्जीवन दिवपाक जाय. कारण चडशीं आंब्याचीं कलमां गोंयांत विकसीत जाल्यांत. मानकुराद आंब्याचें उत्पन्न वाडल्यार मध्यमवर्गीय, गरिबांक तो खावपाक मेळटलो. सरकाराचें अनुदान, सवलत, येवजण कांय थारावीक बागायतदार, शेतकार सोडल्यार हेरां मेरेनूय पावनात. कित्याक लागून जाता हें? हवामानूय मदीं खेळ खेळटा आनी आंब्याक धपको दिता. मानकुरादाची साठवण योग्य पद्दतीन जावंक जाय. मानकुराद चडसो पिकोवन खावपाकूच वापरतात. पूण हेर आंब्यांचो जाम, लोणचें, ज्युस करपाक वेवसायीक पांवड्यार करूं येता. आंब्यांचेर संशोधन जाता. ताका बेगीन कीड लागची न्हय, खत पडचें न्हय हे खातीर शास्त्रज्ञ वावुरतात. तांणी केल्लीं कलमां घडये गोंया भायर वतात आसतलीं. फक्त शेतकारांकूच न्हय. तर कोमुनिदादींकूय तीं मेळपाक जाय. गोंयची कृशी लागवड तिगोवपाक तांणी आपल्या शिल्लक उरिल्ले जमनींनी आंबो लागवड करची. काजू हें गोंयचे राज्यफळ, ताचे सकयल आंबो येता. देखून ह्या दोनूय फळांक शक्य तितली उर्बा मेळची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
