भांगरभूंय | प्रतिनिधी
गुरुदास सावळ @ 75 महाभारतांतल्या झुजांतलो कठीण चक्रव्यूह मोडपी अभिमन्यू सदां यादींत उरतलो. गोंयचीं माध्यमां, राजकारण, सहकार, समाज, राजभास आनी हेर चळवळींक वाट दाखोवपी शेंकड्यांनी अभिमन्यू आसात, वांटेकार हजारांनी. चळवळींनी वांटो घेवपी पांच- धा. जात, धर्माचो चक्रव्यूह मोडत आपल्या समाजाक, तत्वांक वेंग मारून रावपी ज्येश्ठ पत्रकार, स्तंभलेखक गुरुदास सीताराम सावळ तातूंतले मोलादीक. पांच पाचशांक रस्त्यार देंवोवपाचे मतांचे राजकारण ताणीं केलें ना. एका तेंपार तांकां म. गो. पक्षाची उमेदवारी मागपाक पत्रकारांचो पंगड गेल्लो. उमेदवारी मेळ्ळी ना, पूण ‘अभिमन्यू’ जावन गोंयच्या राजकी चक्रव्यूह (फुडाराचीं गुपीतां) फोडपाच्या तांच्या वावराक आयजय तेंको मेळटा.
दिसाळीं, माध्यमां वाटावपाक उलो मारपाचो तांचो वावर जैता मेरेन व्हरपी, दिसाळ्यांक, माध्यमांक उंचेल्या पावंड्यार पावोवपी. तांचें मार्गदर्शन आमकांय दिका दाखोवपी, सगल्यांक एकठांय हाडपाचें चिंतनां, विचारांचे गांठवल दिवपी. गोंयच्या माध्यमांतले राजकी अभिमन्यू अशें सन्मानपत्र तांकां फुडारांत मेळ्ळ्यार अजाप जावचें न्ही. तांचे पिरायेचें अमृत महोत्सवी वर्स हें आमच्या देशाच्या संविधानाचें 75 वें वर्स. ह्या वर्साक तांचेकडल्यान एकच अपेक्षा समाजाचे मार्गदर्शक जावपाची. मराठी राजभास कित्याक जाली ना तें सांगपी चळवळीची म्हायती दिवपी पुस्तकाची. गोंय श्रमिक पत्रकार संघटनेक संजीवनी दिवप, अखिल भारतीय राष्ट्रीय पत्रकार संघटनेची अधिवेशनां गोंयांत घडोवन हाडप, श्रमशक्तींतलें कार्यालय गुजा खातीर मेळोवप तांच्या फुडारपणा खाला तांच्याच मार्गदर्शनांतल्यान पत्रकारांक शक्य जालें.
गोंयांत पत्रकारां खातीर पत्रकार कल्याण निधी येवजण जाली, बदल जाले, पत्रकार वेतन आयोग, फ्रिडम ऑफ प्रेस आनी हेर आंदोलनांतय ते मुखार, बराबरीन पत्रकारितेंतले ल्हान, व्हड. तांच्या सांगातान आमी उलोवपाक, बरोवपाक, विरोध करपाक, शिस्त पाळपाक, झगडपाक, आयजय आसात. विद्यार्थी चळवळींतय ते काॅलेजींत शिकतना आशिल्ले.
काळे बावटे दाखोवप, काळीं फितां बांदप हालींच्या दिसांनीय जायत पूण ते दीस वेगळे. त्या दिसांनी पत्रकारांक उपाट तेंको दिवपी समाजमन आशिल्लें, माध्यमां मदीं एकवटय आशिल्लो. सर्त आशिल्ल्या आनी नाशिल्ल्याय दिसांनी पत्रकारां खातीर आशिल्ले कायदे मोडल्यार रस्त्यार देंवपाक उमेद दिवपी सावळबाब पुस्तकांर पुस्तकां दिवंक फाटीं पडले. राजकारणांत, पत्रकारितेंत मार्गदर्शक, गुरु म्हणून तांचें म्हत्व तिगून आसा. सरकारांतल्योच न्हय जाल्यार समाजिक, प्रशासकीय बातम्यो मेळयतना मेळिल्ले म्हायतींतल्यान, फाटल्या फुडल्यां कडेन उलयतना अभिमन्यूच्या चक्रव्यूहाची बांदावळ जाली.
म्हापसा अर्बन बँक, बार्देस बाझार, भंडारी क्रेडिट कोओपरेटीव सोसायटी, गोवा राज्य सहकारी बँक, गोवा मराठी अकादमी, गोमंतक मराठी अकादमी संचालक, वांगडी अशीं अधिकारपदां तांकांय मेळ्ळीं. गोवा श्रमीक पत्रकार संघटनेचें अध्यक्षपद वेंचणुकेंतल्यान सगल्यांत चडवेळा तांकां मेळ्ळें. सहकार, समाजाचें, राजभास चळवळीचें पडबिंब तांच्या स्तंभलेखनात, बातम्यांनी दिसता. पत्रकारांक उणें लेखल्यार, अन्याय जाल्यार जमदग्नीचो अवतार घेवन पत्रकार परिशदांचेर बहिश्कार घालप, गोंयच्या इतिहासांत सचिवालयांची, मंत्रालयाचीं दारां आडावपाक ते सदांच फुडें. देखीक आदले पर्यटनमंत्री लुईस प्रोत बार्बोजा, पयलींचे मुखेलमंत्री चर्चिल आलेमांव हांच्या आदिलशहा राजवाड्यांतल्या, प्रदेश काँग्रेसिच्या पत्रकार परिशदांचेर घाल्ले बहिश्कार.
‘झंडा उंचा रहे हमारा’ हो गोवा श्रमिक पत्रकार संघटनेच्या स्मरणिकेंतलो तांचो लेख फुडार सांगपी नासलो तरी संघटनेचो तांबडो बॅनर तांच्या कामगार चळवळींतल्या योगदानाची गवाय. प्रिंट मिडीयाचें संपादकपद तांकां मेळिल्लें नासत पूण प्रुडंट मिडीयाचें मुखेल संपादपी पद तांकां फावो जालें. मेळिल्ल्या अधिकारपदांक ताणीं न्याय्य दिला.
जल्म, प्राथमिक शिक्षण पेडणे, माध्यमिक शिक्षण कुडतरे, उंचेलें शिकप मडगांवा, कर्मभूमी पणजे. चौगुले म्हाविद्यालयांत शिकतना कविता, कथा आयतारच्या ‘राष्ट्रमत’ दिसाळ्यांत छापून आयल्यो. नवप्रभाचे मुखेल बातमीदार, गोवा दूताचे सहाय्यक संपादपी पदा मेरेन पावपाची कुशळताय मडगांवांतल्या कथा, कवितेंतल्यान तांकां मेळ्ळी आसुंये. तांच्या वाडदिसाक मडगांवच्यान केक धाडपी तांचे कॉलेजींतले सांगाती उद्येगपती दत्ता दामोदर नायक आयज मराठी भाशेंतल्यान बरयतात. सावळबाब, तूं कोंकणीतल्यान बरय अशें तांकां ताणीं केन्ना म्हजेवरी सांगिल्लें आसत व्हय?
नवप्रभा दिसाळ्यांत उपसंपादक – खबरांकार ते प्रुडंट मीडीयाचे मुखेल संपादपी अशी पांच दसकांची (1974 आरंभ) सावळबाब हांची भौमाध्यमी पत्रकारिता गोंयचो एक इतिहासच. गोवन वार्ता आनी हेर दिसाळ्यांनी तांचें अखंड स्तंभलेखन आयजय चालू आसा. त्या स्तंभलेखनातल्यान तांच्या चिंतनांनी दिसानदीस परिपक्वताय आयिल्ली पळोवंक मेळटा.
तांची घरकान्न मिनाक्षी निवृत्त सरकारी कर्मचारी, पूत दीपेश (सिताराम) सावळ हेय अधिकारी हो योगायोग. सून स्टेट बँक ऑफ इंडियांत. दिव्यश्री (दिव्या), दिपेश आनी नात श्रृष्टी घडोवपांतय तांचो व्हड वांटो. रिटायर्ड बट नॉट टायर्ड अशें सावळबाब समाजिक वावरांत, पत्रकारितेंत मग्न रावपी. आपले गुरु पत्रकार लक्ष्मीदास बोरकार जल्मशताब्दी समितीचें अध्यक्षपद पिरायेच्या 75 व्या वर्सा सांबाळटात. तांकां ना म्हणपी कोण आसचो ना हो अणभव पत्रकारांनी अधिवेशना गोंयांत जाल्ले वेळार घेतला. साबार भोवमान, पुरस्कार सरकारी, समाजीक संस्था, संघटना कडल्यान तांचे कडेन आपसूक आयल्यात. एकादरो विशय खबरेंतल्यान, स्तंभांतल्यान मांडप आनी फाटल्यान लागून समाजहीताचे प्रस्न सोडोवप हें तांचें खाशेलपण. दिसाळ्यांक जायराती दिवपाचो मार्गय संस्था, संघटनांक तांणी दाखयलां. सावळबाब अंदूं 12 ऑक्टोबराक दसऱ्यादिसा @ 75 त पावतना तांचो ल्हानसो भोवमान सुवाळो 13 ऑक्टोबराक सहकार मित्रमंडळ, ज्येश्ठ पत्रकार संघटना, गोंयचे वतीन जातलो. तांकां व्हड आयुश्य, बरी भलायकी मेळपा पासत एकठांय जावन जीवेत शरद: शतम् आवंडेवपाक.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
