भांगरभूंय | प्रतिनिधी
रमेश तवडकार : म्हज्या राजिनाम्याची बातमी फट
भांगरभूंय । प्रतिनिधी
पणजी : म्हज्या हातांत माती दिली तरीय तिचें भांगर करपाची तांक म्हज्यांत आसा. हे खातीर उरिल्ल्या देड वर्साच्या काळांत तीन वर्सां इतलो वावर म्हज्या कडल्यान निश्चीत जातलो, असो विस्वास म्हाका आसा. खात्यां विशीं हांव असमाधानी आसा आनी राजिनामो दितलों अशें कांय कडेन उजवाडाक आयिल्ली बातमी फटीची आसा, अशें खेळां मंत्री रमेश तवडकार हांणी सांगलें.
खेळां आनी कला संस्कृती खात्याचे मंत्री रमेश तवडकार हांणी बिरेस्तारा पत्रकार परिशद घेतली. ह्या वेळार उत्तर गोंय जिल्हो पंचायत अध्यक्ष धाकू मडकयकार आनी तियात्र अकादमीचे अध्यक्ष अँथनी बार्बोजा हाजीर आशिल्ले.
सभापती म्हूण हांव समाधानी आशिल्लो. अधिवेशनाच्या निमाण्या दिसा मंत्रीपदा खातीर इत्सूक नाशिल्ल्याचें हांवें मुख्यमंत्र्यांक सांगिल्लें. पक्षाक म्हजी मंत्री म्हूण गरज दिसली. पक्षान आदेश दिले उपरांत हांवें मंत्रीपद घेतलें. खात्या संबंदांत हांव पुराय समाधानी आसा, अशें तवडकार हांणी सांगलें.
पुताच्या शिक्षणीक प्रवेशा निमतान हांव बंगळुरू गेल्लों. बंगळुरूंत आशिल्ल्यान म्हाका मंत्रीमंडळाचे बसकेक हाजीर रावपाक जालें ना. भाजपाचे सुकाणू समितीचो हांव वांगडी. म्हजे गैरहाजिरेंत सुकाणी समितीची बसका जावंक ना. तरी लेगीत सुकाणू समितीचे बसकेंत म्हजे विशीं चर्चा जाल्ल्याचो उल्लेख कांय जाणांनी बातम्यांनी केला. 1996 सावन आदिवासी समाजा खातीर हांव वावर करतां. हाचे मुखारूय हो वावर हांव चालूच दवरतलों, अशें तवडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
