भांगरभूंय | प्रतिनिधी
वाळपय: ‘माती आणि माणसं’ हें फक्त बारीकसाणीन बरयिल्लें पुस्तक न्हय तर ह्या पुस्तकांतल्यान जिवो जाल्ल्या काळाचो एक कुडको आसा अशें मत मुंबयचें रामभाऊ म्हाळगी प्रबोधिनीचें संचालक डॉ. जयंत कुलकर्णी हांणी मांडलें. बिरेस्तारा गोंय विद्यापिठांतल्या परिशद सभाघरांत आयोजीत केल्ल्या प्रा. विनय बापट हांणी बरयिल्लें ‘माती आणि माणसं’ ह्या पुस्तकाच्या उक्तावण सुवाळ्याक मुखेल उलोवपी म्हूण ते उलयताले. ह्या वेळार माचयेर मुखेल सोयरे प्रा. अनील सामंत, मानाचे सोयरे डॉ. प्रकाश पर्येंकार, कार्यावळीचें अध्यक्ष डॉ. वृषाली मांद्रेंकार, लेखक प्रा. विनय बापट आनी कार्यावळीचें समन्वयक प्रा. विनय मडगांवकार हाजीर आशिल्ले. गोंय विद्यापिठांतल्या शणै गोंयबाब भास आनी साहित्य महाशाळे खाला कार्यरत आशिल्ल्या मराठी अध्यायन फांट्या वतीन कार्यावळीचें आयोजन केल्लें.
हांतूंतलीं व्यक्तिचित्रां त्या काळाचे प्रतिनिधित्व करतना दिसतात. मातयेंत जाचें अतूट नाळ जोडलां अशीं हीं व्यक्तिचित्रां आसात अशें डॉ. कुलकर्णी हांणी सांगलें.
गोंयचो ग्रामीण वाठार, थंयचो सैम आनी थंयची मनश्यां एकरूप जावन पुस्तकांत लेख बरयल्यांत अशें प्रा. बापट हांणी सांगलें, आनी पन्नास शंबर वर्सां उपरांत गोंयचें तेन्नाचे गांवगिरी जीण केशी आशिल्ली हें जाणून घेवपाक जाय जाल्यार हें पुस्तक तांचें खातीर दस्तावेज थारतलें, अशें मत प्रा. विनय बापट हांणी मांडलें.
हें पुस्तक म्हणल्यार एका काळा वेलें भाश्य आसा. हें पुस्तक म्हणल्यार गोंयच्या संस्कृतीक इतिहासाचो दस्तावेज थारला. हातूंत सैम हो वर्णनात्मक पांवड्यार न्हय तर चैतन्यान भरला. ह्या लिखाणांतले लेख तपशील वाचकाक अजापीत करून लेखन चिंतनशिलतायेचें जे तरंग लाभलां, ताका लागून हें लिखाण उंचेल्या पांवड्यार पावलां. सकारात्मकता हें ह्या लेखनाचें वैशिश्ट आसा अशें प्रा. सामंत हांणी सांगलें.
माती आनी तें मातये कडेन जुळ्ळिल्ली मनश्यां प्रा. बापट हांणी तांच्या लिखाणांत समर्थपणान उबीं केल्यांत. सत्तरीच्या मातयेंतल्यान निर्माण जाल्ली आनी एक साहित्यकृती आसा अशें डॉ. प्रकाश पर्येंकार हांणी सांगलें.
हें पुस्तक वाचून स्वताक भूतकाळांत व्हरता, आयचे पिळगेक पयलीचें लोक कशे जगताले आनी खंयचें परिस्थितीत तोंड दितालें हें जाणून घेवपाचें आसा जाल्यार हें पुस्तक मुजरत वाच्चें अशें डॉ. वृषाली मांद्रेंकार हांणी सांगलें.
कार्यावळीक येवकार आनी प्रास्तावीक डॉ. विनय मडगांवकार हांणी केलें. जाल्यार डॉ. हेमंत अय्या हांणी उपकार आठयले.
दिव्या बर्वे हिणें सादर केल्ल्या पसायदानान कार्यावळीची सांगता जाली. पुराय कार्यावळीचें सूत्रसंचालन सायली गर्दे आनी ओंकार गोवेकार हांणी केलें. ह्या वेळार भुरग्यांनी फुलांची रांगोळी घाल्ली. हीं रांगोळी हाजीर आशिल्ल्या सगल्यांचें लक्ष ओडून घेताली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
