मातयेचीं आयदनां रांदपा खातीर सगळ्यांत बरींः नॅशनल इन्स्टिट्यूट ऑफ न्युट्रिशन संस्था
भांगरभूंय | प्रतिनिधी
नवी दिल्ली, खबरां संस्था ः लोकांनी आतां स्टील वा अॅल्युमिनियमाच्या बदलाक नॉन स्टिक आयदनानी जेवण रांदपाक सुरवात केल्या. ह्या आयदनानी जेवण जळपाचे वा दसपाचो भंय ना, पूण हाका लागून तुमची भलायकी इबाडूंक शकता. हालीं नॅशनल इन्स्टिट्यूट ऑफ न्युट्रिशन (NIN) हे संस्थेन भारतीय लोकां खातीर आहार मार्गदर्शक तत्वां जारी केल्यांत. जांतूत मातयेच्या आयदनाची सुरक्षीतताय आनी फायद्याचो उल्लेख केला.
एनआयएनच्या मतान, मातयेची आयदनां पर्यावरणाक अनुकूल आसतात, तेल उणें वापरतात आनी पोशक तत्वां तिगोवन दवरतना जेवणाची सैमीक रुच तिगोवन दवरपाची बरी तांक तांतूत आसता. हीं आयदना विखारी ना आनी तातूंत कसलेंच रसायन वापरनात.
जेवण करपाक खंयची आयदन वापरची?
तज्ञांच्या म्हणण्या प्रमाण, जेवण करपाक फूड-ग्रेड स्टेनलेस स्टीलाचीं आयदनां वापरपाक कसलीच हरकत ना. हीं आयदनां तिगपी, निवळ करपाक सोपी आनी भलायकेक बरी मानतात. पूण मातयेचीं आनी सिरॅमिकची आयदनांय जेवण करपाक सुरक्षीत आसतात. पूण तांची योग्य जतनाय घेवप गरजेची. मातयेच्या आयदनांत रांदप एक पारंपारीक पध्दत आनी भलायकेक बरी अशें मानतात.
एडविना राज, क्लिनिकल न्यूट्रिशन अँड डायटेटिक्स, एस्टर सीएमआय हॉस्पिटल बंगलुरु हांणी ‘द इंडियन एक्सप्रेस’ कडेन उलयतना सांगलें, मातयेच्या आयदनांनी उश्णताय उणी करपाची तांक आसतचा. तुमच्या जेवणांतले पोशक तत्व तिगोवन दवरपाकय हीं आयदनां प्रभावी आसतात. पूण ही आयदना नेमान निवळ करपाची गरज आसता, जर कोणाक तांच्या जेवणांत फावो ते पोशक तत्व जाय जाल्यार मातयेचीं आयदनां तांचे खातीर एक बरो पर्याय.
नॉन स्टिक आयदनां हानीकारक आसात?
फाटल्या कांय वर्सांत नॉनस्टिक आयदनांत वापरिल्ल्या टेफ्लॉन कोटिंगाक लागून हुस्को वाडला. नॉन स्टिक कुकवेअर चड गरम करप टाळचें अशें तज्ञ सांगतात. कारण टेफ्लॉन कोटिंग फ्लेक्स बंद जावन हानीकारक वायू सोडटात. ह्या धुंवरांक लागून तुमच्या पुलमांवांक लुकसाण जावंक शकता आनी फ्लू सारकीं लक्षणां दिसूंक शकतात, तांकां पॉलिमर फ्यूम फिव्हर अशें म्हण्टात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
