भांगरभूंय | प्रतिनिधी
नवी दिल्ली, खबरां संस्था: न्यूज क्लिकाचे संपादक प्रबीर पुरकायस्थ हांचे सुटकेचे आदेश सर्वोच्च न्यायालयान दिल्यात. प्रबीर पुरकायस्थ हांचेर कांय दिसां आदीं युपीए खाला गुन्यांव दाखल केल्लो. उपरांत तांकां दिल्ली पुलिसांनी अटक केल्ली. दिल्ली पुलिसांनी युपीए खाला केल्ले कारवायेक आव्हान दिवपी याचिका सर्वोच्च न्यायालयांत दाखल केल्ली.
हे याचिकेर सर्वोच्च न्यायालयांत सुनावणी जाले उपरांत बुधवारा पुरकायस्थ हांकां न्यायालयान सोडपाचे आदेश दिले. न्युजक्लीक ह्या वृत्त संकेतस्थळान चिना कडल्यान बेकायदेशीरपणान निधी घेतिल्ल्याचो आरोप आसा. तशेंच चिनी प्रचारा खातीर न्युजक्लिकाक कोट्यांनी रुपयांचो विदेशी निधी मेळिल्ल्याचो आरोप आरोपपत्रांत केल्लो. हो निधी अमेरिकेच्या मार्गान पुरयल्ल्याचें नमूद केल्लें.
अटक आनी बंदखण बेकायदेशीर
‘बेकायदेशीर कारवाय प्रतिबंधक कायद्या’च्या (यूएपीए) विवीध कलमां खाला प्रबीर पुरकायस्थ हांचेर गुन्यांव दाखल केल्लो. ह्या प्रकरणांत फाटल्या वर्सा पुरकायस्थ हांकां दिल्ली पुलिसांनी अटक केल्ली. मजगतीं आतां सर्वोच्च न्यायालया मुखार जाल्ले सुनावणे वेळार न्यूजक्लिकच्या संस्थापकाची अटक आनी उपरांत तांकां जाल्ली बंदखण बेकायदेशीर आशिल्ल्याचें सर्वोच्च न्यायालयान म्हणलां. रिमांडा पयलीं अटकेचें कारण तांकां वा तांच्या वकिलांक सांगूंक नाशिल्लें, अशें निरिक्षण न्यायालयान नोंद केलां.
मजगतीं, यूएपीए प्रकरणांत प्रबीर पुरकायस्थ हांकां सोडपाच्या सर्वोच्च न्यायालयाच्या आदेशाचेर अर्शदीप खुराना हांणी प्रतिक्रिया दिल्या. तांणी म्हणलें, सर्वोच्च न्यायालयान अटक आनी रिमांडची कार्यवाही बेकायदेशीर थारयल्या आनी प्रबीर पुरकायस्थ हांचे सुटकेचे निर्देश दिल्यात. आता ट्रायल कोर्टा मुखार जामीनपत्र सादर करपाचे निर्देश दिल्यात. आमी सुरवातेक सावन तांचे आड जाल्ली कार्यवाही ही बेकायदेशीर आसा अशें म्हणिल्लें. तशेंच अटक करपाची पद्धत बेकायदेशीर आशिल्ली, हें आतां सर्वोच्च न्यायालयानूय म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
