भांगरभूंय | प्रतिनिधी
थळाव्यांक त्रास : पालिका सयत जिल्लोधिकाऱ्यां कडेन कागाळ
मडगांवः एसजीपीडीएच्या ठोक नुस्त्याच्या बाजारांत गाडयो पार्क केल्यार कर लागता म्हणून कांय ठोक नुस्तें विक्रेत्यांनी माडेल फातोड्ड्यां गाडयो पार्क करून नुस्तें भरपाक आनी काडपाक सुरवात केल्या. ह्या समांतर नुस्त्याच्या मार्केटाक लागून थळाव्या लोकांक त्रास जातात. देखून पालिका, भलायकी खातें आनी जिल्होधिकारी कार्यालयांत तांणी कागाळी केल्यात.
नुस्तें मार्केटाचे नवे इमारतीचें उक्तावण अजून जावंक ना. ह्या बाजारांतल्या घाणयाऱ्या उदका खातीर योग्य सांडपाणी प्रक्रिया प्रकल्प ना. ताचो त्रास माडेल फातोड्ड्यांच्या लोकांक जातालो. तशेंच साळ न्हंयेंच्या प्रदुशणाचोय प्रस्न आसा. आतां माडेलच्या लोकांक एक नवी समस्या सोंसची पडटा.
हें नुस्तें घेवन येवपी ट्रकांक लागून अशीर रस्त्यांचेर येरादारीची कोयंडी वाडल्या. ट्रकांतल्यान गळपी घाण उदकाक लागून दुर्गंध येवपाक लागला. मार्केटांतल्या नुस्त्याचें नमुने तपासतात. पूण हांगा कसलीच चांचणी करिनासतना नुस्तें विकपाक लागल्यात. थळाव्या लोकांनी ह्यो समस्या मांडल्यात. थळावो रहिवासी साविओ डायसान हे संबंदी चवकशी आनी कारवाय करपाची मागणी करून पालिका मुखेल अधिकारी, भलायकी खातें, अन्न आनी वखदां खातें, दक्षीण गोंय पुलीस अधीक्षक आनी दक्षीण गोंय जिल्लोधिकारी हांचे कडेन कागाळ दाखल केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
