भांगरभूंय | प्रतिनिधी
दत्ता हांणी स्वताचे कल्पकतायेची जोड दिवन माटोळी सोबीतकायेन सजयली. कलेच्या देवाक एका शेतकामती कलाकारान ओंपिल्ली हीं एक कलासेवाच!
चवथीक माटोळीकार दत्ता शंभू नायक हांकां तांणी कलात्मकतायेन देवी गांवशीकान्न नवदुर्गा रूपांत रचिल्ले माटोळेक गोंय कला आनी संस्कृती संचालनालयान आयोजित केल्ले राज्य पावंड्यावेले माटोळी सर्तींत पयलें इनाम फावो जालां. सातवें फावट पयलें इनाम जोडपी तें एक प्रतिभावंत कलाकार थारयल्यात. सातत्यान स्वता कश्टल्या उपरांत आनी माटोळी सारक्या समर्पण भावनेंतल्या कलेची सेवा कलाधिपती गणरायाच्या पांयां कडेन रूजू करून पाचवेचार जैत मेळोवपाक आमच्या प्रियोळ गांवच्या ह्या माटोळी कलाकाराक शक्य जालां. हें जैत मेळोवंक हातभार लायिल्या दरेकल्याक आनी मुखेलपणान माटोळीकाराक सातव्या फावट मेळिल्ल्या ह्या जैताची खोशीयेभरीत परबीं.
माटोळीकार दत्ता बाब हांच्या जैताक सांगोड घालता गोवा फॉरवर्ड पार्टी आयोजित ‘आमचो गणपती, आमची माटोळी’ सर्तींतूय तांकां मेळिल्लें पयलें इनाम. अशें तरेन दोट्टे जैत तांणी अंदूं चवथीक मेळयलां. देखून ह्या दोनूय जैतांक खातीर शेतकामती कलाकार बाब दत्ता हांचें विशेश कवतूक. तांच्या वावरांत तांकां मजत करपी घरच्यांची आनी हेंर वावुरप्यांचीय खासा तोखणाय.
बाब दत्ता हांणी साकारिल्ली गांवशीकान्न श्रीनवदुर्गा रूपांतली सुमाराक साडेतिनशां परस चड फळफळावळ आनी हेंर रानवटी फळां, मुळां आनी हेंर वनस्पत वापरून बांदिल्ली माटोळी खरेंच पळोवप्याचें काळीज जिखून घेताली. आंब्याच्या काथ्यां पासून उबें केल्ले माटोळे सकयल्ले उबें चार खांबें तर आकर्शणाचे विशय थारलें.
मडकय- पारंपाय थळार देठली नेशिल्ली देवी नवदुर्गा एका गो-राखण्याक प्रसन्न जाल्ली. आवयच्या रूपांत देवतेन परगटायिल्लें हें ममतामयी स्वरूप माटोळींतूय ममत्वाची उमाळी भरून तरेकवार रानवटी फळांच्या आकारान उबें जाल्लें अशें म्हणल्यार तीं उतरांची अतिताय निश्चितच थारची न्हय. देवतेचेर स्रद्धा भावार्थ आशिल्ल्या भाविकांक नवदुर्गा गांवशीकान्न देवीचे हें माटोळेंत साकारिल्लें रूप खूब भावलें. बाब दत्ता हांणी ह्या माटोळींतल्यान तांचें काळीज जिखलें.
चवथ म्हणल्यार धादोसकाय आनी समर्पण दाखोवपी उत्सव. आमीं धादोसकायेन जें पिकयलें वा सैमान जें आमकां दिलें तेंच प्रकृतीचो दैवी अंश आशिल्ल्या वा त्याच भूंयेंतल्या मातये पासून केल्ल्या मुर्त रूपांतल्या गणपतीक व्हडा नमळायेन आनी कृतज्ञतायेन समर्पण करपाची ‘माटोळी’ हीं एक पारंपरीक रित घराघरांत आसा. बाब दत्ता हांणी स्वताचे कल्पकतायेची जोड दिवन माटोळी सोबीतकायेन सजयली. कलेच्या देवाक एका शेतकामती कलाकारान ओंपिल्ली हीं एक कलासेवाच!
गांवशीकान्न श्री नवदुर्गे
देवते आदीशक्ती आदीमाये
देठली नेशिल्ली अशी
आवय देवते तूं परगटली
गो-राखण्याक आवय रूपांत
ममत्व भावनेन तूं दिसली
वैशाख कृष्णपक्ष नमीक
दर्शन घडयलें अशे
तळेखोल पारंपाई थळांत,
गांवशीकान्न श्री नवदुर्गे
माटोळेंत सजयलें रूप तुजे
चवथीक अंदूं तरेकवार फळांत
श्री दत्ताच्या घरमठयेंत
प्रियोळ गांवांत माटोळेंत
रूप कलाकारान साकारले,
शुभ आज्ञेन तुज्याच देवते
दिव्य ममत्वमयी रूप
तुवेच भाविकांक हें दाखयले
गोकुळदासापूतान ओंपिल्ली
हीं काव्य फुलां पावन जालीं,
गांवशीकान्न श्री नवदुर्गा
आमकां आशिर्वाद दिवंक
माटोळेच्या मखरांत बसली
– गौरांग गोकुळदास नायक
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
