भांगरभूंय | प्रतिनिधी
होलसेल दरांत फुलां विकपी बिगर गोंयकारांचेर जातली कारवाय
भांगरभूंय | प्रतिनिधी
पणजी : बाजारांत बसपी परंपरीक माटोळेकारां कडल्यान सोपो कर घेवचो न्हय, अशे निर्देश पंचायत आनी पालिकांक दितले. तशेंच जे भायले लोक होलसेल दरांत फुलां विकतात तांचेर कारवाय करपाचे निर्देश पुलिसांक दितले, अशें आस्वासन मुख्यमंत्री डॉ. प्रमोद सावंत हांणी दिलें.
परंपरीक माटोळेकार आनी रस्त्यार फुलां विकपी बिगर गोंयकारांचो विशय फातोड्डेंचे आमदार विजय सरदेसाय आनी सांत आंद्रेचे आमदार विरेश बोरकार हांणी सभाघरांत शुन्य वरा वेळार मांडिल्लो. जे गोंयकार गांवठी भाजी पिकयतात तांकां त्यो विकपा खातीर बाजार मेळना. देखून तांकां आपल्यो गांवठी भाजी विकपाक मेळच्यो हे खातीर तांकां पंचायतीन आतां सावन ते चवथीच्या 11 दीस मेरेन बाजाराची सुवात तयार करून दिवची, अशी मागणी सरदेसाय हांणी केली. तशेंच मुख्यमंत्री आपलो अर्थसंकल्प चवथीचे माटोळे सारको स्वंयपूर्ण आसा अशें म्हणटा. मात गोंयकारांची चवथीची खरी माटोळी स्वंयपूर्ण करपाचेर लक्ष दिवचें. ते खातीर जे परंपरीक माटोळेचें सामान विकतात तांकां त्रास करचो न्हय आनी तांकां सोपो माफ करचो, अशी मागणी सरदेसाय हांणी केली.
मजगतीं बाजारांत फुलां विकपा खातीर सुवातो निश्चीत केल्यात, थंयसरूच बसून हो वेवसाय करपाक जाय. मात बिगर गोंयकार येवन रस्त्या कुशीक ठोक दरांत फुलां देखीक रोजां विकतात. ह्या प्रकारांक लागून बाजारांत जीं थळावीं फुलकारां आसात तांचेर हावळ आयल्या, अशी कागाळ सांत आंद्रेचे आमदार विरेश बोरकार हांणी केली.
जे पंरपरीक माटोळेकार बाजारांत माटोळेंचें सामान विकतात तांकां थाकाय दिवन तांचे कडल्यान सोपो कर वसूल करचो न्हय अशे निर्देश पालिका आनी पंचायतींक दितले. तशेंच जे बिगर गोंयकार रस्त्यार होलसेल दरान फुलां विकतात तांचेर कारवाय करपाचे निर्देश पुलिसांक दितले, अशें आस्वासन डॉ. सावंत हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
